ده‌قێ په‌یاما سه‌رۆكێ هه‌رێما كوردستانێ ب هه‌لكه‌فتا سالڤه‌گه‌را سه‌رهلدانێ:
ب هه‌لكه‌فتا 30 سالییا سه‌رهلدانا ئازارێن گه‌لێ كوردستانێ، سلاڤ بۆ شه‌هیدێن ئازادییا كوردستانێ، سه‌رێ رێزێ و خوه ل هه‌مبه‌ر گیانێ وان یێ پیرۆز د چه‌مینین، ب رێز و حورمه‌ت ڤه سالڤه‌گه‌را سه‌رهلدانێ دوباره دكه‌ین.
سلاڤ ل گه‌لێ خۆراگرێ كوردستانێ كو ب هه‌موو پێكهاته‌یێن خوه ڤه به‌ری 30 سالان وه‌ك ئه‌ڤرۆ ل ده‌روازه‌یێ رانیه یا خۆشتڤی دا ب خرڤه‌بوونه‌كا جه‌ماوه‌ری یا مه‌زن ل هه‌مبه‌ر زۆرداری و دكتاتۆرییێ سه‌رهلدان و د گه‌ل پێشمه‌رگێن قه‌هره‌مانێن كوردستانێ، ئێك ب ئێك گوند و باژارۆك و باژارێن ئاخا خوه ئازادكرن.
ئه‌ڤرۆ بیر ب وان رۆژێن پیرۆز و قه‌هره‌مان دكه‌ین، كوردستان د هه‌موو ده‌مه‌كی دا زێده‌تر پێدڤی ب ئێكرێزی، ته‌بایێ و پێكڤه‌بوونا هه‌موو ئالی و پێكهاته‌یانه دا كو بكاریت په‌یام و ئارمانجێن پیرۆزێن سه‌رهلدان و به‌رهه‌مێ خوینا شه‌هیدان بپارێزیت و به‌ره‌ڤ پاشه‌رۆژه‌كا باشتر ببه‌ت.
هه‌ر وه‌كو چاوا د سه‌رهلدانێ دا هه‌موو كوردستانی ب هه‌موو پێكهاته‌یێن نه‌ته‌وه‌ی و ئۆلی و هه‌موو ئاراسته و هێز و ئالیێن سیاسی یێن جودا د به‌ره‌یه‌كێ ئێكگرتی دا پێكڤه سه‌رهلدان و سه‌ركه‌ڤتن، نها ژی ب هه‌مان شێوه هه‌موو پێكڤه د كارن رووبرووی زه‌حمه‌ت و ئالۆزییان ببن و مافێن ده‌ستووری یێن خوه ب ده‌ستبێخن و بپارێزن.
د ڤێ هه‌لكه‌فتا پیرۆز دا داخواز ژ هه‌موو هێز و ئالی و پێكهاته‌یێن كوردستانێ دكه‌م، سالڤه‌گه‌را سه‌رهلدانێ بكه‌ینه هێڤێنێ ته‌بای و ئێكرێزی و نه‌هێلانا كێشه و ناكۆكییان تا گیانێ كاروانێ شه‌هیدێن كوردستانێ شاد بكه‌ن و هه‌موو پێكڤه به‌ره‌ڤ پاشه‌رۆژه‌كا باشتر بچن، پێكڤه بۆ كوردستانه‌كا ئارم، ئاڤه‌دان و سه‌قامگیر خه‌باتێ بكه‌ن بۆ لاندكا ئازادی، لێبۆرین، پێكڤه‌ژیان و ئێكدوقه‌بولكرنێ بمینن.
