سەرەدانا قەداسەتا پاپایێ ڤاتیکانێ بۆ ئیراقەکا وێران و بۆ کوردستانا ئاڤەدان و پێکڤەژیانێ. پاپا فره‌نسیس، پاپایێ ٢٦٦ یێ ڤاتیکانێ یە و خەلیفەیێ مار پەترۆس و ئۆسقفێ رۆما یە و ھەر وەسا سەرۆکی دەولەتا فاتیکانێ یە، ژیێ وی نها ٨٤ سالن، سەردەانا وی بۆ ئیراقێ و کوردستانێ دێ یا دیرۆكى بیت و رەنگڤەدانا خوە یا گرنگ ھەیە، لێ بۆ ئیراقێ جودایە ژ کورستانێ، چ ژ ئالیێ سیاسی و ئایینی ڤه و و چ ژ ئالیێ ئابووری ڤە.
ژ ئالیێ سیاسی ڤە ئەڤ سەرەدانە گرنگیا خوه یا مەزن ھەیە بۆ ئیراقێ، ئەو ئیراقا پڕی قەیرانێن سیاسی و ئابووری و ئەمنی و ساخله‌مى، ئیراق ژ ئەنجامی نەسەقامگیریا سیاسی و ئابووری و ئەمنی نها ژ جڤاکی ناڤدەولەتی دوور كه‌فتییه، لەورا سەرەدانا پاپای دێ پشته‌ڤانییه‌كا مەزن بۆ دەولەتەکا ب ناڤ دەولەت كه‌تن یا پڕی گەندەلییا ئابووری و ناکوکیین سیاسی و تائیفگەری و میلیشیاتێن نە رێکخستی دەستهەلاتی دکەن و حکومەتەکا نەشێت ئیدارا مەلەفی ئەمنی ب ریڤەبەت و نەشێت خزمەتا وه‌لاتیین خوه بکەتن.
ژ ئالییه‌كێ دی ڤە سەرەدانا پاپایی بۆ ئیراقێ کارتێکرنا خوه ل سەر ھەبوونا مەسیحیان ل ئیراقێ ھەبیت، پشتی کو ئەڤ پێکھاتە تووشی مەترسی و نەمانێ بووین پشتی سالا ٢٠٠٣ێ، کو تووشی کوشتنی و کریارێن تیرۆرستی بوویە و دێر و کەنیسه خرابکرینە و تا نها و تایبەتی ل مووسلێ پشتی ھاتنا داعشێ و تووشی کوشتنێ و تالانكرنێ بووین و جهـ و شوونوار و باژێرێن وان ھاتینە خرابکرن ژ ئالیێ داعشێ ڤە و ژ جھێن وان یێن دیرۆكى ل دەشتا نه‌ینه‌وا هاتینه ده‌رخستن و نها هه‌ژمارا مەسیحیان گه‌له‌ك کێم بوویە و یا گەھەشتیە هه‌ژمارەکا مەترسیدار.
د بەرنامێ سەرەدانێ دا بریارە پاپا بچیتە پاریزگەھا ناسریە ل پاژێرکی ئەریدو کو جھەک ب ناڤی ئۆر و گرنگیا خوه یا ئایینی ھەیە بۆ ھەرسی ئایینان، مەسیحی و بوسرمان و جوھیان کو باژێری بابێ مە ھەمیانە ئیبراھیم سلاڤێن خودێ ل سەر بن، ھەر وەسا باژێرەکە پڕی جھێن شوونواری و پتری ١٣٠٠٠ جھێن شوونواری لی ھەنە و ل ڤی جھی دێ ھەڤدیتنەک ھەبیت دگەل نوونەرین ھەموو ئایینێن ئیراقێ و دێ دپەیڤا خوه دا دوپاتیێ لسەر پره‌نسیپێن ئاشتیی و پێکڤەژیانێ دناڤبەرا ھەموو پێکھاتان دا، ژبه‌ركو دروشمێ سەرەدانا وی بۆ ئیراقێ (ھوین ھەمی برانە).
سەرەدانا پاپای بۆ ئیراقێ دێ بیتە پالدەرەکێ بھێز بۆ مەسیحیان یێن ژ جهـ و پاژێر و وەلاتێ خو دوور و جارەکا دی ھزرا ڤه‌گه‌ریانێ بکەن و ل وەلاتی خوه ئاکنجی ببن کو عەردی باب و باپیرێن وانە و ھەر وەسا سەرەدانا پاپای دێ بیتە دەرمانەک بۆ برینا مەسیحی و ئێزیدیێن د دەستێ داعشێ و گرۆپێن تیرۆرستی دا بریندار بووین .
سەرەدانا قەداسەتا پاپایی بۆ ئیراقێ گرنگیەگا روحی و ئایینی ھەیە و دێ رۆلەکێ مەزن د نێزیکبوونا رەئی و بۆچوونێن دناڤبەرا بوسرمان و مەسیحیان دا ھەبیت و دێ رحەتیەکێ و پشته‌ڤانیه‌كێ دەتە مەسیحیان.
سەرەدانا پاپاى دێ گرنگیەکا مەزن دەتە ئیراقێ و رۆلێ ئیراقێ د دەڤەری دا، ژبه‌ركو ئیراق ژبەر شەران و گەندەلیێ و پێکدادانا تائیفی گه‌له‌ك لاواز بوویه و پێکھاتێن وی یێن رەسەن وەک مەسیحی و ئێزیدی بجهـ ھێلاین و بەر ب وەلاتێن بیانی چووین و ژبلی کوشتنا ب ھزاران ژ گەلێن عیراقی یێن رەسەن، ھەروەسا ئەڤ سەرەدانه پالپشتیە بۆ ھەموو ئەو کەسێن تووشی کوشتن و تالانکرن و ئاوارەبوونێ بووین، ژبه‌ركو ئەڤ پاپایه یێ ناسیارە ب پشته‌ڤانییا خوه بۆ ھەژار و ئاوارە و یێن تووشی زولم و زۆرداریی بووین و گرنگیێ ددەتە دانوستاندن و قەبوولکرنا ئێکدو و ئاشتیبوونا نەتەوەیی و ئایینی و جڤاكى و دوپاتیێ ل سەر پێکڤەژیانێ د ناڤبەرا ھەموو پێکھاتان دكه‌ت، ئیراق ژى وەلاتەکێ فره نەتەو و ئایین و مەزاھبانه و لڤێرێ پاپا دزانیت ئیراق پێدڤی ب پالپشتیا بنەمایێن ئاشتیبوون و تەسامح و پێکڤەژیانێ یه.
سەرەدانا وی بۆ کوردستانێ گرنگیەکا دیرۆكی هه‌یه، ژبه‌ركو دێ راگەھاندنا جیھانێ ھەموو بەحسی کورستانێ کەت و جیھان ھەموو دووڤچوونا سەرەدانێن پاپایێ ڤاتیکانێ دکەت، ژبه‌ركو یێ ناسیارە ب مرۆڤەکێ ئاشتیخواز و راستگۆ و دوور ژ توندرەویێ، پاپاى زانیارى ھەنە کو کوردستان لاندکا ئاشتیبوونێ و پێکڤەژیانێ یه و رێزێ ل مافێ مرۆڤ و مافێ ھەموو پێکھاتان دگریت، زانیاری ھەنە پیشمەرگەى شەرێ داعشێ کریە و شیایە ئەفسانەیا داعشێ بشکێنیت و دەڤەرێن مەسیحیان ژ داعشێ رزگار بکەت و ب سەدان شەھید پێخەمەت پاراستنا مەسیحیان داینه و ھەر وەسا دزانیت چاوا کوردستان پتر ژ دو ملیۆن ئاوارە ژ ئیراقێ و دەشتا نه‌ینه‌وا حەواندینه و تا نها ژی ب دەھان کەمپێن ئاواران ھەنە، لەوما حکومەتا کوردستانێ گرنگیەکا مەزن دایە سەرەدانێ و دێ شانازیێ پێ به‌ت، ژبه‌ركو پاپا دێ جوداھیەکێ د ناڤبەرا کورستانێ و ئیراقێ دا ژ ھەمی لایەکی ڤە بینیت.
