پشتی گەھشتنا ڤاکسینێ دژی کۆرۆنایێ بۆ ھەرێما کورستانێ و وەزارەتا ساخلەمیێ دیارکری کو دێ ل دووڤ پرۆتۆکۆلا جیھانی ڤاکسین دێ ھێتە دان ب کارمەندێن ساخلەمیێ ب گشتی و تایبەت ڤە، ھەروەسا د دووڤ دا ھێزێن ناڤخوە و کەسێن ب عەمر و نەخۆشێن دۆمدرێژ ھەی، ئێکەتیا مامۆستایێن کوردستانێ ژی داخوازێ ژ وەزارەتا ساخلەمیێ دکەت کو ڤاکسینێ بدەنە مامۆستایان ژی.
ئەحمەد گەرمیانی، سەرۆکێ ئێکەتییا مامۆستایێن کوردستانێ تایبەت بۆ خانی نیوز راگەھاند، ئەوان بەری چەندەکێ سەرەدانا وەزارەتا ساخلەمیێ کریە و یاداشتنامەیەک ئاراستەی وەزارەتێ کریە و داخواز کریە کو پشتی نۆشدار و کارمەندێن ساخلەمیێ ڤاکسینێ دژی کۆرۆنایێ بدەنە مامۆستایان ژی، داکو پرۆسەیا خواندنێ بەردەوامی پێ بھێتە دان.
ئەحمەد گەرمیانی گۆت ژی: ژبەرکو پرۆسەیا خواندنێ پرۆسەیەکا گەلەک گرنگە و ئەڤ داخوازیە ژبۆی وێ یەکێ یە کو پرۆسەیا خواندنێ بەردەوام بیت، ژبەرکو پێشتر ژبەر بەلاڤبوونا ڤایرۆسێ کۆرۆنایێ راوەستیابوو.
ناڤبری گۆت ژی: ژ ئالیێ خوە ڤە وەزارەتا ساخلەمیێ بەرھەڤییا خوە دەربری بۆ دانا ڤاکسینێ دژی کۆرۆنایێ ب مامۆستایان، لێ نھا ھەژمارەکا کێم یا ڤاکسینی گەھشتیە ھەرێما کوردستانێ و ئەو ھەژمار ژی ھندە بۆ کارمەندێن ساخلەمی و نۆشداران بھێتە دانان.
سەرۆکێ ئێکەتیا مامۆستایێن کوردستانێ ئاشکرا کر، وان وەکی ئێکەتیا مامۆستایان پێشنیازکریە ھەکە ڤاکسین ب ھەمی مامۆستایان ژی نەھێتە دان بلا ب ھندەک مامۆستایان بھێتە دان، ئەو ژی ئەو مامۆستانە یێن ب تەمەن و نەخۆشیێن دۆمدرێژ ھەی.
خانی نـیوز، سەعد عاسف
