رێكخه‌رێ راسپاردێن ناڤده‌وله‌تى ل حكومه‌تا هه‌رێما كوردستانێ راگه‌هاند؛ كوردستان د پاراستنا پێكهاتێن ئایینى و نه‌ته‌وه‌ى دا پێشه‌نگه و چ كه‌س ل سه‌ر جیاوازییا نه‌ته‌وه‌ى رووبرووی كێشه‌یان نه‌بووینه.
دیندار زێبارى، رێكخه‌رێ راسپاردێن ناڤده‌وله‌تى ل حكومه‌تا هه‌رێما كوردستانێ راگه‌هاند؛ پشتى ئازادكرنا ئیراقێ ل سالا 2003ێ، هه‌رێما كوردستانێ جهێ ئێكانه‌یه كو تێدا هه‌موو پێكهاتێن ئایینى و نه‌ته‌وه‌ى و مه‌زهه‌بى هه‌ست ب ئارامییێ دكه‌ن و ل هه‌رێما كوردستانێ چ كه‌س ل سه‌ر جیاوازییا نه‌ته‌وه‌ى رووبرووی كێشه‌یان نه‌بووینه. به‌روڤاژى وی یه‌كێ حكومه‌ت به‌رده‌وام پشته‌ڤانییێ ل پێكڤه‌ژیانا ئایینى و نه‌ته‌وه‌ى دكه‌ت بێى ل به‌رچاڤگرتنا جیاوازییا ئایینى و مه‌زهه‌بى و نه‌ته‌وه‌ى، هه‌روه‌سا ده‌رگه‌هێن هه‌رێمێ ڤه‌كرینه و تا نها ب ده‌هان خێزانێن كریستییان و ئێزدى و توركمان و شه‌به‌ك و عه‌ره‌ب ژ ده‌ڤه‌رێن باشوور و ناڤه‌راستا ئیراقێ بۆ پاراستنا گیانی خوه به‌ره‌ڤ هه‌رێمێ ڤه هاتینه و حكومه‌تا هه‌رێمێ ژى ل گۆره‌ى شیانێن خوه هه‌موو ئاسانكارى بۆ وان كرینه و وه‌كو هه‌موو وه‌لاتییێن دى یێن كوردستانێ ژیانا خوه بێى هیچ فشاره‌ك ب سه‌ردبه‌ن.
ل دۆر پاراستنا مافێن پێكهاتێن ئایینى گۆت: ل هه‌رێمێ كار ل سه‌ر چه‌ندین قانوونان دهێته‌كرن كو بۆ خزمه‌تا پێكهاتێن ئایینى و نه‌ته‌وه‌ى، وه‌كو قانوونا ژماره 5 یا سالا 2015ێ كو ب قانوونا پاراستنا مافێ پێكهاتان ل هه‌رێمێ دهێته نیاسین و قانوونا ژماره 6 یا سالا 2014ێ كو ب قانوونا زمانێن فه‌رمی یێن هه‌رێمێ دهێته نیاسین. ل سالا 2017ێ ژى حكومه‌تا هه‌رێمێ ناڤێ وه‌زاره‌تا ئه‌وقاف و كاروبارێن ئیسلامى بۆ وه‌زاره‌تا ئه‌وقاف و كاروبارێن ئایینى گوهۆری كو هه‌موو پێكهاتێن ئایینى نوونه‌رێن خوه تێدا هه‌نه.
ده‌رباه‌ى پشكدارییا سیاسى یا پیكهاتێن ئایینى د پرۆسا سیاسى دا گۆت: پشتى هه‌لبژارتنێن سالا 1992ێ و پێكئینانا په‌رله‌مانێ كوردستانێ كو ژ 100 كورسییان پێك هاتبوو، 5 كورسى بۆ كریستییانان هاتبوونه ته‌رخانكرن، و ل سالا 2005ێ بۆ 11 كورسییان هاتن زێده‌كرن كو 5 كورسى بۆ توركمانان، 5 كورسى بۆ كلدان و ئاشوورى و سریانییان و كورسییه‌ك ژى بۆ ئه‌رمه‌نانه.
گۆت ژى، ل هه‌رێما كوردستانێ ب ده‌هان قوتابخانه ب زمانێ سریانى هه‌نه و رێڤه‌به‌رییا گشتى یا خواندنا سریانى ژى ل وه‌زاره‌تا په‌روه‌ردێ هه‌یه.
دیار ژى كر، ره‌شنڤیسێ ده‌ستوورێ هه‌رێما كوردستانێ پێنگاڤێن گرنگ ل به‌رگرتینه و پێكهاتێن دى یێن هه‌رێمێ وه‌ك كه‌مینه وێنه نه‌كرینه، د وى چارچووڤه‌ى ژى دا حكومه‌تا هه‌رێما كوردستانێ به‌رده‌وام بزاڤان بۆ بهێزتركرنا گیانێ ته‌بایى و پێكڤه ژیانێ دناڤبه‌را گشت پێكهاتێن ئایینى و مه‌زهه‌بى و نه‌ته‌وه‌ى یێن هه‌رێما كوردستانێ دانه یێن كو ل هه‌رێما كوردستانێ دژین.
