هه‌رێما كوردستانێ وه‌ك كیانه‌كێ ده‌ستۆری و فیدرالی، سه‌ره‌رایی هه‌می ئاسته‌نگێن ئیراقى و هه‌رێمی، لێ شیایه ببیته خودان سه‌نگ و پێگه‌هێ خۆ ل ئاستا ده‌ڤه‌رێ و جیهانێ.
ل ڤان چه‌ند سالێن بووری ب تایبه‌تی ل قۆناغا شه‌رێ دژی داعشێ و پشتی هینگی، رۆلێ پێشمه‌رگه‌ی د شكاندنا داعشێ دا و حه‌واندنا ب سه‌دان هزار ئاواره‌یان، هه‌ڤكاری و هه‌ماهه‌نگی یا سیاسی و له‌شكه‌ری دگه‌ل هه‌ڤپه‌یمانییا ناڤده‌وله‌تی، ئه‌ڤه هه‌می بوونه فاكته‌ر كو زێده‌تر سه‌نگا هه‌رێما كوردستانێ ژ روویێ دبلۆماسی ڤه ل ئاستا جیهانێ دیاربوو.
پتریا سه‌رۆككۆمار و سه‌رۆكوه‌زیر و شاندێن بلندێن دبلۆماسی یێن وه‌لاتان، ده‌ما سه‌ره‌دانا به‌غدایێ دكه‌ن، وێستگه‌ها دویێ بۆ سه‌ره‌دانا وان هه‌ولێرا پایته‌ختا هه‌رێما كوردستانێ یه، ئه‌ڤه ژی وێ چه‌ندێ خویا دكه‌ت كو هه‌ولێر ژی خودان ناڤه‌نده‌كا گرنگ یا بریاردانێ یه، بێی وێ چ بریار ل سه‌ر چاره‌نڤیسێ عێراقێ و ده‌ڤه‌رێ ناهێنه دان، ئه‌ڤه ل سه‌ره‌دانا ڤان رۆژان یا قه‌داسه‌تا پاپا فرانسیس زێده‌تر ئاشكرابوو، كو هه‌مان ئه‌جندا سه‌ره‌دان و كۆمبوونێن وی یێن ل به‌غدا ل هه‌ولێرێ ژی هاتنه كرن، دیدارێن دگه‌ل مه‌زنه به‌رپرسێن ئیراقى كرین دگه‌ل مه‌زنه به‌رپرسێن هه‌رێما كوردستانێ ژی كرن، واته ئه‌ڤه وێ په‌یامێ دگه‌هینیت كو هه‌ولێر و به‌غدا كه‌س ژ وان لایه‌نێ بهێز یان یێ لاواز نینه، چ لایه‌ن بێی یێ دی نه‌شێت چ بریاران ل ئاستا جڤاكا ناڤده‌له‌تی ب سه‌پینیت، به‌لكو هه‌ولێر و به‌غدا هه‌ڤكیف و ته‌مامكه‌رێن ئێكن بۆ هه‌ر كار و بریاره‌كا چاره‌نڤیسساز ل دۆر ئیراقێ و گه‌لێ وێ.
