د. سالح: گۆتارا مستەفا کازمی نییەتێن باش تێدا ھەبوون

مامۆستایەکێ زانکۆیێ دیارکر: د گۆتارا سەرۆک وەزیرێن ئیراقێ مستەفا کازمی دا ئاماژەیێن باش ھەبوون، ژ وانا ڤەکرنا لاپەرەیەکێ نوو بۆ چارەسەرکرنا کێشەیێن ھەولێر و بەغدایێ، چونکە نە ھەولێر و نە ژی بەغدا چ مفایەک ل وان ئالۆزییان نەدیتیە.
د. سالح عومەر پرۆفیسۆرێ ھاریکاری یێ زانستێن سیاسی ل زانکۆیا سەلاحەدین بۆ خانی نیوز دیارکر، کازمی دڤێت ب رێکا دەستۆری کێشەیێن ھەولێر و بەغدا چەرەسەربکەت، ھەموو ئالییەکێ ژی پشت راست دکەت کۆ دەستورێ ئیراقێ رێکا ھەرە سەرەکییە بۆ چارەسەرکرنا کێشەێن ھەردوولا.

دەربارەی پێشوازیکرنا ھەرێما کوردستانێ ل گۆتارا کازمێ وێ ماموستایێ زانکۆیێ خویاکر: دەمێ سەرۆکێ ھەرێما کوردستانێ پێشوازیێ ل گۆتارەکێ دکەت ب شێوەیەکێ راستەوخۆ ھەموو ئالیێن سیاسی یێن ئیراقێ ئاگەھدار دکەت کۆ ھەرێم ھەردەم ئامادەیە بۆ ھەر دانۆستاندنەکا نیشتیمانی لێ ل سەر بنەمایەکێ دەستۆری.

ناڤبری دازانین ژی ھەرێما کوردستانێ ھەردەم نییەتێن باش بۆ رایا گشتی یا ئیراقی نیشاندانە لێ جھێ داخێ یە، ھندەک ئالییان جادەیا ئیراقێ وەسا ئاگەھدارکریە کۆ ھەرێما کوردستانێ پەیوەندییەکا خراب دگەل بەغدا دکەت، لێ پێشوازیکرن ل گۆتارا سەرۆک وەزیرێن ئیراقێ بەرسڤدانەکە بۆ وان ھەموو ئالییان کۆ ھەرێم ھەردەم دەستپێشخەر بوویە ل سەر بنەمایێن دەستۆری کێشەیێن ھەلاویستی چارەسەر بکەن.