نێچیرڤان بارزانى: پشته‌ڤانیێ ل‌ په‌ياما قه‌داسه‌تى د‌كه‌ين

نێچیرڤان بارزانى سه‌رۆكێ هه‌رێما كوردستانێ راگه‌هاندنه‌ك ل دۆر ب دووماهی هاتنا سه‌ره‌دانا پاپا فره‌نسیسى به‌لاڤكر و راگه‌هاند: ستایشا قه‌داسه‌تى بۆ كولتورى و پێكه‌ڤه‌ژيانێ و لێبورینێ ل كوردستانێ جهێ سه‌ربه‌رزى و شانازيیا مه‌یه‌.

ئه‌ڤه‌ ژى ده‌قێ راگه‌هاندنا سه‌رۆكێ هه‌رێما كوردستانێ یه‌:

ب ڕێزه‌كا مه‌زن ڤه‌ ئه‌م سه‌ره‌دانا قه‌داسه‌تا پاپاى بۆ ئیراقێ و هه‌رێما كوردستانێ دبینین، و دگه‌ل نه‌ ئارامییا ره‌وشێ ژى، ئه‌و یێ رژد بوو ل سه‌ر سه‌ره‌دانا خوه‌، ئه‌ز ژ دل سوپاسیا وى دكه‌م، و ستایشا قه‌داسه‌تى بۆ كولتوورى و پێكه‌ڤه‌ژيانێ و لێبورینێ ل كوردستانێ جهێ سه‌ربه‌رزى و شانازيیا مه‌یه‌.
زۆر سوپاسییا هه‌موو پێكهاته‌یێن ئايينى و نه‌ته‌وه‌يێن كوردستانێ د‌كه‌م كو ب د‌ڵگه‌رمييه‌كا زۆرڤه‌‌‌ پشكدارى د ڕێوڕه‌سمێن پێشوازیێ و مێهڤانیكرنا قه‌داسه‌تا پاپای دا كرن، ب تايبه‌تى به‌ڕێزان مامۆستا و كه‌سايه‌تێن ئايينێ ئیسلامێ و هه‌موو ئايينێن دي یێن كوردستانێ و ئیراقێ. ئه‌وان وێنه‌يه‌كێ جوان یێ شارستانيیه‌تا ڕه‌سه‌ن و ڕاسته‌قينه‌ییا پێكهاته‌یێن گه‌لێ كوردستانێ و كولتوورێ لێبورینێ و پێكڤه‌‌ژيانێ و برايه‌تيێ نيشا هه‌موو جيهانێ دا. ‌
شه‌ر و توندتيژییێن ل ئیراقێ، هه‌روه‌ك ل قه‌داسییا هه‌ولێرێ دا قه‌داسه‌تا پاپا گۆتى چاره‌سه‌رى ب تنێ لێبورین و ميهربانييه‌ كو‌ هه‌ر ئه‌وژى داخوازا خودێ یه‌‌‌ ژ مرۆڤان.
ئه‌م ل هه‌رێما كوردستانێ ب‌ هه‌موو شێوه‌يه‌ك پشتگيریێ ل‌ په‌ياما قه‌داسه‌تى بۆ ئاشتیێ، لێبورینێ، پێكه‌ڤه‌ژيانێ، ئێكترقبووڵكرن، لابرنا كه‌رب و كينیێ‌، توندڕه‌وى، تيرۆر و تۆلڤه‌كرنێ‌ د‌كه‌ين. ئه‌وان چه‌مك و بهایان‌ بنه‌ما یێن سه‌‌ره‌كيێن كۆمه‌ڵگه‌ها كوردستانێ نه‌ و وه‌ك هه‌رده‌م دێ پارێزگاریێ لێكه‌ین. هیڤیدارم ل ئیراقێ و هه‌رێما كوردستانێ ژى ب گیانێ وێ په‌یامێ كێشه‌ و ناكوكى بهێنه‌ چاره‌سه‌ركرن.
سوپاسییا هه‌ماهه‌نگيیا د ناڤبه‌را حكومه‌تا فيدراڵا ئیراقێ و حكوومه‌تا هه‌رێما كوردستانێ و هه‌موو ئه‌و لايه‌نێن په‌يوه‌ندیدار‌ دكه‌م كو وان وه‌كر ئه‌و سه‌ره‌دانا مێژوويى ل‌ ئاسته‌كێ به‌رزدا ژ ڕوویێ پرۆتۆكۆلى و ڕێكخستنێ و ئاسايشێ ڤه‌، ب ڕێكوپێكى ب ڕێڤه‌ بچیت.‌

نێچيرڤان بارزانى
سه‌رۆكێ هه‌رێما كوردستانێ
8 مارس 2021