ل گۆرى راگه‌هاندنه‌كا سه‌رۆكایه‌تییا حكومه‌تا هه‌رێما كوردستانێ، مه‌سرور بارزانى سه‌رۆكێ جڤاتا وه‌زیرێ هه‌رێمێ سه‌رپه‌رشتییا كۆمبوونه‌كا تایبه‌ت ب به‌رهه‌ڤیێن پرۆژه یاسایا بۆدجه‌یا هه‌رێما كوردستانێ بۆ سالا 2021 كریه.
د كۆمبوونێ قوباد تاله‌بانى جێگرێ سه‌رۆكێ حكومه‌تێ ئاماده‌بوویه و گۆتوبێژ ل دۆر ره‌وشا نها یا دارایی یا هه‌رێمێ و به‌رهه‌ڤیێن پرۆژه یاسایا بۆدجه‌یا هه‌رێما كوردستانێ بۆ سالا 2021 و داتایا خه‌رجى و داهاتییێ خه‌ملاندى یا وه‌زاره‌تان هاته كرن و جه‌خت ل وێ یه‌كێ هاته كرن كو د به‌رهه‌ڤیێن پرۆژه‌یاسایا بۆدجێ دا پێدڤییه هه‌موو ئه‌گه‌ر ل پێشچاڤ بهێنه وه‌ر‌گرتن و بۆدجه‌یه‌كا وه‌قیعى و شه‌فاف بیت و پشت ب داتایا په‌ترۆلێ و نه په‌ترۆلێ و كورتهێنان و خه‌رجییا راسته‌قینه ب به‌ستیت، ئه‌ڤه ژى ب ئارمانجا گرنگیدانێن زێده‌تر ب شه‌فافییه‌تێ د داراییا هه‌رێما كوردستانێ.
هه‌روه‌سا هه‌ر د ئه‌وێ كۆمبوونێ دا، دووماهی پێشڤه‌چوونێ د پرۆژه‌یاسایا بۆدجه‌یا حكومه‌تا فیدرال بۆ سالا 2021 هاته گۆتوبێژكرن كو بریاره هه‌فتییا بهێت د جڤاتا نوونه‌رێن ئیراقێ ده‌نگ ل سه‌ر بهێته دان.
راگه‌هاندنێ ئاماژه‌كریه، سه‌رۆكێ حكومه‌تا هه‌رێما كوردستانێ دووپاتى ل هه‌لوێستێ نه‌گهۆر یێ هه‌رێما كوردستانێ كریه‌ڤه بۆ چاره‌سه‌ركرنا بنه‌ره‌تییا ئاریشه‌یێن هه‌لاویستى یێن ناڤبه‌را هه‌رێما كوردستانێ و حكومه‌تا فیدرال ژ وان ژى بابه‌تێ شایبسه‌ته‌یێن دارایی یێن هه‌رێمێ ل سه‌ر بنه‌مایێ ده‌ستورى.
سه‌رۆكێ حكومه‌تێ هیڤیخواستینه، لایه‌نێن ئیراقى پێشوازى و پشته‌ڤانیێ ل بانگه‌وازییا سه‌رۆك وه‌زیرێن فیدرال مسته‌فا كازمى بكه‌ن ژ بۆ چاره‌سه‌ركرنا ریشه‌یی یا ئاریشه‌یێن د ناڤبه‌را هه‌رێما كوردستانێ و حكومه‌تا فیدرال.
