سه‌ره‌دانا پاپای و ڤالاهییا پشكداربوونا ژنێ

پاپا فرانسیس، پاپایێ ڤاتیكانێ د سه‌ره‌دانا خوه‌ دا بۆ ئیراق و كوردستانێ د گه‌ل هه‌ژماره‌كا سه‌ركرده‌یان كۆمبوو، لێ دگه‌ل هیچ سه‌ركرده‌یه‌كا ژن كۆمنه‌بوویه‌ و ڤالاهییه‌كا به‌رچاڤ یا ئاماده‌نه‌بوونا ژنێ هاتییه‌ دیتن.

ئاڤان جاف، سه‌رنڤێسه‌را رۆژناما ژن بۆ خانی نیوز گۆت: وان تێبینییه‌كا باش كرییه‌ كو هیچ كۆمبوونه‌كا فه‌رمی و جودا د گه‌ل سه‌ركرده‌یێن ژن نه‌هاتییه‌ كرن و ئه‌ڤه‌ ژی بۆ وێ یه‌كێ دزڤریت كو پرۆتۆكۆلێ  پێشوازییا پاپای د ده‌ستێ زه‌لامان دایه‌ له‌ورا  ژن هاتییه‌ پشتگوهـ هاڤێتن، ته‌نێ نوونه‌را ئاینێ زه‌ره‌ده‌شتییان كو ژن بوو د پێشوازیێ دابوو لێ پاپا ب فه‌رمی دگه‌ل كۆمنه‌بوویه‌ و گۆت ژی: زۆر گرنگ بوو سه‌رۆكا په‌رله‌مانێ، سه‌رۆكا ئافره‌تان د ئاماده‌ببان و ب گۆتنا ئاڤان جاف، بۆ به‌رپرس و ئالیێن ‌حكومی ژی دیمه‌نه‌كێ نه‌جوانبوو، لێ دشتێ سه‌رنجا وێ راكێشای كو كریستیان ب ژن و زه‌لام و بێی جوداهییا ره‌گه‌زی د پشكداربوون و پێشوازی ل پاپای كرن.

گۆت ژی: پێدڤییه‌ د سه‌ره‌دانێن پاشه‌رۆژێ دا ژن ژی د پرۆتۆكۆلێ دا كار ل سه‌ر رێكخستنێ بكه‌ن داكو كه‌ساتی ب یه‌كسانی بهێن ده‌ستنیشانكرن و هه‌روه‌سا راگه‌هاندكارێن رۆمالا هه‌لكه‌فتان ژی دگێرن چنكو زه‌لامن له‌ورا ژنێ ب شێوه‌یه‌كێ باش دیار و به‌رچاڤ ناكه‌ن.

ل دۆر بوچوونا چیان مه‌هدی، چالاكڤان د بوارێ مافێن ژنێ دا و ئه‌نداما لقا ئێك یا پارتی گۆت: ئه‌و د وێ باوه‌رێ دابوون رۆله‌كێ مه‌زنتر د هاتنا پاپای دا بده‌ن ژنێ كو چه‌ندین ژنێن سه‌ركرده‌ هه‌نه‌ و دڤیا د ئاماده‌بان و ژنێن سه‌ركردێن ئاینی ژی هه‌نه‌ بۆ نموونه‌ ژنێن ئۆلدارێن ئێزدی و زه‌ره‌ده‌شتییان، لێ ئاماده‌نه‌بوونا ژنێ بۆ زه‌لامی دزڤریت چنكو به‌هایه‌كێ مه‌زن ناده‌نێ و ئه‌ڤه‌ دێ ب خه‌له‌تی زڤریت ژبه‌ر كو وه‌ك جڤاكا ناڤده‌وله‌تی تێبینیا بۆشاییا ژنێ هاتییه‌ كرن و ده‌ما شاندێن مه‌ ژی سه‌ره‌دانا ده‌رڤه‌ دكه‌ن ته‌نێ بۆ رویمه‌تیێ ل هه‌مبه‌ر جڤاكا ناڤده‌وله‌تی ژنان دگه‌ل خوه‌ دبه‌ن.

ژ ئالییه‌كێ دی هه‌دیا موراد، ئه‌نداما په‌رله‌مانێ كوردستانێ ل دۆر ئاماده‌نه‌بوونا ژنێ خویا كر، پاپا فرانسیس، په‌یاما ئاشتیێ گه‌هاندییه‌ وان و ئاین و سیاسه‌ت ژ هه‌ڤ دوور كرینه‌ له‌ورا دگه‌ل ئالیێن سیاسی كۆمنه‌بوویه‌ و دگه‌ل سه‌رۆك بارزانی و ده‌سته‌یا سه‌رۆكاتییێ كۆمبوویه‌، ئه‌ڤه‌ رامانا وێ یه‌كێ دده‌ت كو دگه‌ل حكومه‌تێ هه‌موویێ كۆمبوو، هه‌روه‌سا ژ به‌ركو ره‌وشا ساخله‌مییا سه‌رۆكا په‌رله‌مانێ نه‌یا جێگیربوو، جێگرا سه‌رۆكێ د رێوره‌سمێن پێشوازیێ دا یا به‌رهه‌ڤبوو، گۆت ژی: كۆمنه‌بوونا پاپا دگه‌ل سه‌ركرده‌یێن ژنێن سیاسی بۆ وێ یه‌كێ دزڤریت كو ئه‌و ژنێن سه‌ركرده‌ یێن حزبی نه‌ و پاپا ئاین و سیاسه‌ت ژ هه‌ڤ دوور كرینه‌ و ژ بلی سه‌رۆكاتییێ ته‌نێ دگه‌ل ئالیێن ئاینی كۆمبوویه‌.

دێرین خدر، چالاكڤانا سیاسی ژی گۆت: ب بوچوونا وێ ئه‌ڤه‌ كێمكرنه‌ ل هه‌مبه‌ر ژنێ ژبه‌ركو ژنێن سه‌ركرده‌ ل هه‌رێم و ئیراقێ هه‌نه‌ و دڤیا كۆمبوونێن ب فه‌رمی د گه‌ل وان هاتبان كرن، ژبه‌ر كو ژنا كورد هه‌تا د شه‌ری ژی دا قوربانییه‌كا مه‌زن دایه‌ و ته‌نێ ئه‌و دكاریت ئێش و ئازارێن خوه‌ راسته‌قینه‌ بگه‌هینیت، ژبه‌ر هندێ ژی بۆ جیهانێ دیاربوو كو كوردستان و ئیراق ده‌ما دروشمێن رۆل و ئازادیێ بۆ ژنێ دیاردكه‌ن، نه‌راستییه‌ك بۆ هه‌یه‌‌، ئه‌گه‌ره‌كێ دی یێ پشكدارنه‌بوونا ژنێ بۆ نه‌ ئێكده‌نگی و ئێكرێزیا مالا كوردی و ئیراقی ژی دزڤریت.