کۆمسیۆنا مافێن مرۆڤى ل ئیراقێ راگههاندییه، ل سەرانسەرى ئیراقێ، ل سالهكێ دا 644 حالهتێن خوهکوشتنێ هاتینه تۆمارکرن.
ئەڤرۆ سێشەمبى، 9-3-2021، فازل غەراوی، ئەندامێ کۆمسیۆنا مافێن مرۆڤى ل ئیراقێ راگەهاندییە، ل سالا 2020 ژمارێن حالهتێن خوهکوشتنێ زێدهبووینه و گەهشتینە 644 حالەتان.
ههروهسا گۆتییه، زۆرترین ژمارا خوهکوشتنێ ل بەغدایا پایتەخت هاتینه تۆمار کرن، کو 139 حالەت بوون و پشتى بەغدا، ل بەسرە 86 حالەت هاتینه تۆمارکرن و ل زیقار 80 حالەت و ل نەینەوا 69 حالەت.
ئەو ژى دیار كرییه، ئەوێن ل سالا بورى خوه کوشتین، 368 كهس ژ وان کور و زهلام بوون و 276 ژى ژن و کچ بوون.
فازل غەراوی ئاشكرا كرییه ژى، گرنگترین هۆکارێن خوهکوشتنا وهلاتییان پێكهاتینه ژ کێشێن جڤاكى و ئابوورى و تێکچوونا رهوشا دەروونی، ژ بلى هەژاریێ و شهرێن بهردهوام ل ئیراقێ.
