ھەڤپەیمانییا فەتح پێشنیبازا کازمی رەت کر

ئەندامەکێ ھەڤپەیمانییا فەتح یا میلیشیایین شیعە ب سەرۆکاتییا ھادی عامری، پیشنیازا سەرۆکوەزیرین ئیراقێ بۆ دانوستاندنێن نشتیمانی د ناڤبەرا ئالیێن ئیراقی دا رەت کر.
ئەبو میساق مەساری سەرکردەیێ ھەڤپەیمانییا فەتح یا ئیراقی راگەھاند، مستەفا کازمی، سەرۆکوەزیرین ئیراقێ دخوازیت سەرەدانان پاپایێ ڤاتیکانێ بۆ نێزیکبوون و راکێشانا چەندین ئالییان بۆ ناڤا پرۆسا سیاسی بکاربینیت.
مەساری گۆت ژی: د راستی دا ئیراق پێدڤی ب دانوستاندنێن نشتیمانی نینە، بەلکو ھەموو ئالییێن سیاسی د پەیوەندییان دانە د گەل ھەڤدو، چو ڤەقەتیان ژی د ناڤبەرا پێکھاتەیان دا نینن.
سەرکردێ ھەڤپەیمانییا فەتح یا میلیشیایێن شیعە ئاشکرا ژی کر، شاش بکارئینانا سەرەدانا پاپای ژ ئالیێ کازمی ڤە دێ کارەساتان ل دووڤ خوە ئینیت و دێ ئەنجامێن وێ بەرۆڤاژی خواستێن نھا یێن ئیراقێ و پرۆسا سیاسی بن.
دوھی مستەفا کازمی، سەرۆکوەزیرێن ئیراقێ د گۆتارەکا تێلەڤزیۆنی دا راگەھاند بوو، پەیاما سەرەدانا پاپایێ ڤاتیکانێ بۆ ئیراقێ گەھشتە جیھانێ، داخواز ژی ژ ھەموو ئالییێن سیاسی یێن پشکدار د پرۆسەیا سیاسی و ئۆپۆزسیۆنێ ژی کر، دەست ب دانوستاندنێن نشتیمانی بکەن بۆ وێ یەکێ مافێن ئیراقییان مسۆگەر بکەن و ئاساییش و سەقامگیریێ بپارێزن.
ژ ئالیێ خوەڤە نێچیرڤان بارزانی، سەرۆکێ ھەرێما کوردستانێ و مەسروور بارزانی، سەرۆکێ حکومەتا ھەرێمێ داخوازا کازمی قەبوول کر و بەرھەڤییا خوە بۆ وان دانوستاندنان دیار کرییە.