بەرپرس ھەنە بۆریا ئاڤا گشتی بۆ خوە کون دکەن

پرۆژێ قانوونا دووڤچوونا تۆرێن ئاڤێ ل پەرلەمانێ کوردستانێ یە، خواندنا ئێکێ بۆ ھاتییەکرن و ژڤانە ل نێزیکترین دەم خواندنا دوێ بۆ بھێـتەکرن
د.محەیەدین حەسەن یوسف، ئەندامێ پەرلەمانێ کوردستانێ بۆ خانی نیوز ئاشکەراکر، ل ھەفتییا بھێت دێ خواندنا ئێکێ بۆ پێشنیارا پاراستنا وەستگەھێن ئاڤێ و تۆر و سۆلینێن ئاڤێ ل کوردستانێ بھێتەکرن، ژبەرکو گەلەک زێدەگاڤی ل سەر تۆرێن ئاڤێ ل گشت باژارێن کوردستانێ ھاتییەکرن.
ئەندامێ پەرلەمانی ئەو ژی دیارکر، ھەتا کو ئاڤ ژ ژێدەرێ سەرەکی دگەھیتە خەلکی گەلەک چەق ژێ دچن و خەلکەک ھەیە بۆری شکاندینە و ئاڤ بۆ باخچە و بیستانێن خوە و جھێن گەشت و گوزارێ کێشاینە و ئەڤە ھەموو ل سەر ئاڤا گشتی نە و دڤێت سنورەک بۆ بھێتەدانان.
ناڤبری ئەو ژی گۆت: بەرپرس ھەنە بۆریێن ئاڤێ شکاندینە و ئاڤ بۆ خوە کێشاینە و دەستویردان نینە، بۆریا سەرەکی یا ئاڤێ ژ گەلەک جھان ژا ھاتییە کونکرن بەری کو بگەھیتە مالان،ل چەمچەمال ئەف کێشە ھەیە وەرزێ ھاڤینێ ئاف نینە و ئەڤە دێ ب قانوون ھێتە رێکخستن.

خانی نیوز، سالار محەمەد دۆسکی