بھایێ خانیەکێ ب تنێ ئێك یۆرۆیە

ل گزیرتا سقیلیا ل وه‌لاتێ ئیتالیا، خانی ب بھایەکێ وه‌سا دھێنە فرۆتن کەس باوەرناکەت، لەورا ئه‌ڤ نووچه‌یه‌ بوویە بەحسێ گەرمێ میدیایێن جیھانی، کو بھایێ خانیەکێ ب تنێ ئێک یورۆیە، بەلێ فرۆشیارێ وى خانى مەرجێن تایبەت ژی ھەنە.
مالپەرەکێ بریتانی دیار كرییه‌، بھایێ خانییه‌كێ ل ئیتالییا ب تنێ ئێک یۆرۆیە، دیار كرییه‌، کەسەکێ ئوسترالی خانییەک کرییە و وى لبه‌ره‌ 25 خانیێن دی ژى بکریت.
دانی ماکوین د ژیێ 56 سالیێ دایه‌ و خەلکێ ئوسترالیا یە، نوكه‌ ل لەندەن دژیت و دبێژیت: کەسوكارێن وى گۆتییه‌ وى، كو ئه‌و خانییه‌كێ ل گزیرتا سقیلیا ل ئیتالییا بکریت و تێدا ئاکنجی بیت، وى ژی داخوازییا وان بجھئینایه‌ خانیەک کرییه‌.

ئه‌و ژى گۆتییه‌: حکومەتا ئیتالیا ئارمانجەکا مەزنتر ژ وى پرۆژه‌ى ھەیە و دڤێت جاره‌كا دى ژیانێ ل وی جھی په‌یدا بکەت، چونکى نوكه‌ چ کەس ناچیتە وێ گزیرتێ و تێدا بژیت و گەلەک وەلاتیێن وێ گزیرتێ چووینە جھێن دیتر، هه‌روه‌سا ژ روویێ ئاڤادانکرنێ ڤە ژی گەلەک لاوازی لێ هه‌نه‌، لەورا بھایێ خانیەکێ ب تنێ ئێک یورۆیە.
هیشتا دبێژیت: دەستھەلاتدارێن وێ دەڤەرێ و حکومەتا ئیتالیا مەرج بۆ وان کەسان داناینە یێن كو خانیەکی ل وێ ده‌ڤه‌رێ بکرن، دڤێت تێدا ئاکنجی بن و ژیانا خوه‌ یا رۆژانە تێدا دەرباز بکەن، ل گەل وێ چه‌ندێ ژی دڤێت د دەمێ سێ سالان دا ئەو خانیێ کری نووژەن بکەن.