سه‌رۆك بارزانى ل گه‌ل تیما پارتى د حكومه‌تێ دا كۆمبوو

ئه‌ڤرۆ ل باره‌گایێ بارزانى سه‌رۆك مه‌سعود بارزانى ل گه‌ل سه‌رۆكێ جڤاتا وه‌زیرێن هه‌رێما كوردستانێ و تیما پارتى د حكومه‌تێ دا كۆمبوو، د كۆمبوونێ دا راگه‌هاند: پێدڤییه‌ هوون هه‌موو خوه‌ ب خزمه‌تكارێ گه‌لێ كوردستانێ بزانن و دڤێت د ناڤا ته‌خ و چینێن كۆمه‌لگه‌هى و خه‌لكێ هه‌ژارێ وه‌لاتى دابن، هه‌روه‌سا هه‌موو بزاڤێن هه‌وه‌ بۆ هندێ بیت كو ده‌ستهه‌لات ژبۆ خزمه‌تا جه‌ماوه‌رى بهێته‌ بكارئینان.

 

ئه‌ڤه‌ ژى ده‌قێ راگه‌هاندنا باره‌گایێ بارزانى یه‌:

 ئه‌ڤرۆ ڕۆژا شەمبى 13ـی 3ـی 2021ێ سەرۆك مەسعود بارزانى ل سه‌لاحه‌ددین پێشوازی ل سەرۆكێ حكومەتا هەرێما كوردستانێ و تیما پارتی ل حكومەتا هەرێما كوردستانێ كر.

د كۆمبوونه‌كێ دا ل ده‌ستپێكێ مەسرور بارزانی سەرۆكێ حكومەتا كوردستانێ كورتییه‌ك ده‌ربارەی كار و بەرنامەیێن حكومەت و پێنگاڤێن  پڕۆسەیا چاكسازیێ د بوارێ كەرتێ نەفتێ و پێشمەرگەیى و بوارێن جودا جودا یێن دى و پێنگاڤ بۆ زێده‌كرنا داهاتێ حكومەتێ و پێشكەشكرنا خزمەتگوزارییان بۆ وه‌ڵاتییان به‌رچاڤكرن، هەروەسا جەخت ل هندێ كرییه‌ كو كابینەیا حكومەتا هەرێمێ وەك تیمه‌كێ هەماهەنگ و مۆكم و بێ جوداهى دناڤبه‌را لایه‌ن و پێكهێنه‌رێن كاروبارێن خوه‌ ب رێڤه‌دبه‌ت و بزاڤا هندێ ژى دایه‌ بۆ دابینكرنا داهات و خزمەتكرنا خه‌لكى.

 د كۆمبوونێ دا سەرۆك بارزانی په‌یڤه‌ك  پێشكەشی ئامادەبوویان  كر، و ده‌ربارەی ره‌وشا سیاسی و پێشهاتان  د ئاستی كوردستانێ و ئیراقێ و ده‌ڤه‌رێ و ئێكڕیزییا لایەنێن سیاسیێن هەرێمێ ڕوونكرییه‌ و شیره‌تێن پێدڤى به‌رچاڤكرن، هەروەسا دەستخۆشی ل  بزاڤ  و ماندیبوونا تیما پارتی د حكومەتێ دا كر و ڕاگەهاند: پێدڤییه‌ هوون هەموو خوه‌ ب خزمەتكارێن گەلێ كوردستانێ بزانن و دڤێت دناڤ  چین و ته‌خێن جڤاكى دا و خەڵكێ هەژارێ وه‌ڵاتى دا بن و هەموو بزاڤان د وى بازنه‌ی دا چڕ ببێت كو دەستهەڵات ب دروستی و بۆ خزمەتا جەماوەرى بهێته‌ بكار ئینان.

سەرۆك بارزانی ئاماژە دا كو ڕێبازا بارزانی ڕێبازا خزمەتكرنا خەڵكى یه‌ و پێدڤییه‌ خەڵكێ كوردستانێ كەرامەتا خوه‌ د حكومه‌تا خوه‌ دا بینیت.

سەرۆك بارزانی د پشكه‌كا دییا ئاخفتنێن خوه‌دا پشته‌ڤانییا خوه‌ بۆ حكومەتا هەرێمێ دووپات كره‌ڤه‌ و داخواز كر، حكومەت  ل سەر پڕۆسەیا  چاكسازیێ یا بەردەوام بێت و ئامادەییا خوه‌ ژى ڕاگەهاند بۆ سەرخستنا پڕۆسەیا چاكسازیێ ئه‌وا پێدڤى بیت دێ هاریكارییا حكومه‌تا هه‌رێمێ بیت.