فەرمانده‌یێ زێرەڤانیێ: په‌كه‌كێ خوه‌ ژ ئارمانجا خوه‌ لادایه‌

فەرمانده‌یێ هێزا زێرەڤانیێ راگەهاند، هندى وێڤه‌تره‌ ره‌وشا ده‌ڤه‌رێن کوردستانێ ئالۆزتر دبن و خەلک گه‌له‌ك یێ ژ‌ حەشدا شەعبی نیگه‌رانن، دووپاتكرییه‌ په‌كه‌كێ خوه‌ ژ‌ ئارمانجا خوه‌ لادایه‌.

عەزیز وەیسی، فەرماندێ زێرەڤانیێ د لێدوانه‌كا رۆژنامەڤانی دا ل چیایێ زەرتک بۆ ده‌زگه‌هێن راگه‌هاندنێ دیار كر: ره‌وشا ده‌ڤه‌رێن کوردستانی یا ئالۆزە و رۆژ ب رۆژ بەرەف خراپترڤه‌ دچیت، ب تایبەتى پشتى خیانەتا 16ى ئۆکتۆبەرێ ره‌وش ب ڤى شێوەیە و نوكه‌ خه‌لك ژ دەستێ میلیشیاتێن حەشدا شەعبی دره‌ڤن و گه‌له‌ك ژ وان د نیگه‌رانن‌، پێدڤییە پێشمەرگە ڤه‌گه‌رنه‌ وان ده‌ڤه‌ران، ب تنێ ب پێشمەرگەى و ھێزێن سۆپایێ ئیراقێ دێ ره‌وشا ڤێ ده‌ڤه‌رێ هێته‌ کۆنترۆل كرن.

ده‌ربارەی ئالۆزیێن پەکەکێ ل ھەرێما کوردستانێ گۆت: ره‌وشا شنگالێ هندى وێڤه‌تره‌ ئالوزۆتر دبیت، پێدڤییە ئەو رێککەفتنا د ناڤبه‌را ھەولێر و بەغدا بۆ ئاساییکرنا ره‌وشا شنگالێ هاتییه‌ ئیمزا كرن وه‌كو خوه‌ بهێته‌ جێبەجێ كرن و ئەو میلیشیات و ھێزێن بیانی ژێ ده‌ركه‌ڤن، داكو ھێزێن دیتر ھێرش نەكەنه‌ سەر شنگالێ، ب مخابنى ڤه‌، پەکەکە پشتى دەستگیرکرنا ئۆجەلانى ژ خوه‌ ئارمانجا خوه‌ یا سەرەکی لادایە و ل دژی کوردان ب كار دئینیت، د ناڤا پەکەکێ دا كۆمه‌كا کەسێن نیشتیمانپەروەر و باش ھەنە، رێگرى لێ دهێته‌ كرن، پەکەکێ بێخنه‌ سەر رێیا خوه‌، دڤێت ئەڤ گروپە کار بکەن بۆ هندێ پەکەکێ ژ ده‌ستێ وان كه‌سان ده‌ربێخن، كو ژ ئالیێ هژمارەكا وه‌لاتان ل دژى كوردان دهێنه‌ ب كارئینان.