ستوونێن رێبازا بارزانی لسەر هاتینە ئاڤاکرن
مللەتێن بیانی بو خوه سومبول وسەرکردا چێدکەن – ئەگەر خو نەبن ژی – بەلێ مللەتێ کورد و ب تایبەت پارتێن سیاسی هەتا رادەکێ مەزن بجاڤەکێ کێم ونەزان وشێلی تەماشەی سەرکردێن خوه دکەن، و دگەله‌ک هەلکەفتان دا هه‌ڤدوو ب خیانەت ل قەلەم ددەن، مە کوردا پێکڤە بهایێ ڤێ عەقلیەت وئایدلوجیەتا گرتی یا دای وبەرده‌وام یێ دده‌ن. لەورا دێ بێژین: هەبونا سومبۆل وسەرکرده‌یان دناڤا هەر مللەتەکی دا ژ پێتڤیێن سیاسی ومێژووی وجەماوەریە، داكو بو نەڤی ونفشێ داهاتی ببنە پێشەوا و بۆ خوه دەرس وعیبرەتا ژ رێباز و کار وژیانا وان وەرگرن
بوجی رێبازا بارزانی؟
ژ سەرکردێن هەره مەزن کۆ مللەتێن کوردستانێ و ب تایبەت مللەتێ کورد شانازیێ پێ ببەت و مفای ژخەبات و بزاڤا وان وەربگریت جەنەرال (مەلا مستەفا بارزانی 1979 -1903) سەرۆک و دامەزرێنەرێ پارتی دیموکراتی کوردستان( PDK 1946) وسەرکێشێ بزاڤا رزگاریخوازیا کوردستانی پتر ژ (50) سالان. وئەم دشێین بێژین هێزا سەرکەڤتنا ڤی سەرکردەی – هەتا رادەکێ مەزن وبێ رکابەر بو وێ یه‌كێ کۆ بارزانی ئێکەمێن سەرکردێ کوردە دمێژوویا نوودا شیای هەمی مللەتێن لسەر ئاخا کوردستانێ دژین د بن خیڤەت وناڤەروکا کوردستانیەتێ دا کومڤە بکەت، بێى کۆ جێوازیێ بکەت دناڤ تەخ وچینێن مللەتێ کوردستانێ ژێ و پێکهاتین مینا؛ کورد، ئاشوری، ئەرمەن، عەرەب و تورکومانا ئەڤە ژلایێ نەتەوەیی ڤە ، هەمان تشت ژلایێ ئاینی ژی ڤە، مینا موسلمان، مەسیحی، ئێزدی، جوهی وسابیئه‌یان.
دیسان شیایە مرۆڤێن خودان کەسایەتی دناڤا مللەتی دا بکێشتە دناڤا ڤێ خیڤەتێ دا مینا؛ رەوشەنبیر و زانا و ئاغا و مەلا و جوتیار وکەسانێن لەشکەری دناڤا بزاڤا رزگاریخوازا مللەتێ کوردا کومڤە کەت، باشترین نموونە بو ڤێ یه‌كێ شورەشا ئه‌یلولا مەزن بو ل سالێن 1975-1961
ناڤەروکا رێبازا بارزانی
بکورتی : رێبازا بارزانیێ نەمر لسەر سێ ستوونا و شەنگستا هاتیە ئاڤاکرن
ئێك: ستینا نەتەوایەتی : ئانکو بکورتی خەبات وبزاڤکرنا بتنێ ژبو رزگارکرنا ئاخا کوردستانێ ژبن دەستێن دوژمنان.
دو: ستوونا دیمۆکراتی: ئانکو بکورتی : پەیرەوکرنا سیستەمێ دیموکراتی بو رێڤەبرنا حکومرانیا کوردستانێ وعیراقێ، برێکا هەلبژاتن ورادەستکرنا دەستهەلاتێ بشێوەکێ ئاشتیانە ودانا کەسێن ژێهاتی بو جهێن ژیهاتی ودیر ژهەر بابەتەکێ دی.
سێ: ستوونا دادیا جڤاکی: دابەشکرنا داهات وسامانێ وەلاتی ب شوەکێ دادپەروەرانە لسەر هەمی هاوەلاتیا وهەر ئێک لدووف پێتڤیا وی ودیسان دەرفه‌تێن کاری بو هەمی هاولاتیان وهەر ئێک لدیڤ تایبەتمەندیا خو وهەر ئێک لدیڤ پێچێبونا خو.
لێ مخابن پتریا سەرکردێن نوکە و بتایبەت دناڤا پارتی دیموکراتی کوردستان نەشیان ڤێ رێبازا پیروز وپاڤژ وەک پێتڤی پارێزن وجێبه‌جێ بكه‌ن ب تایبەت پشتی حوکمرانی کەتیه دناڤا دەستاد، لەورا داخازێ ژ سەرکردایەتیا پارتی دیموکراتی کوردستان دکەم وتایبەت ژ سەروکێ رێزدار مەسعود بارزانی – خودێ پارێزیت – پێداچونەکا بلەز دناڤ رێزێن پارتی دا بکەت ودووبارە رێبازا بارزانیێ نەمر پاک بكه‌ت ژ مروڤێن گەندەلچی ودزیکەر ومەسلەحچی، ب تایبەت ئەوێن بوینە پەردەکا رەش دناڤبەرا مللەتێ کوردستانێ دا و رێبازا بارزانیێ نەمر. دیسان داخازێ ژ سەروکێ هەرێما کوردستانێ رێزدار نێچیرڤان بارزانی و سەروکێ حوکومەتا هەرێما کوردستانێ رێزدار مسرور بارزانی دکەین بەرنامەکێ رێکوپێک دارێژن بو بەرهنگاریا ڤایروسێ گەندەلیێ، کا چەوا جەنابێ هەوە بەرنامە دارێشتیە بو بەرهنگاریا ڤایروسێ کورونایێ. دهەمان دەمدا یا فەرە بێتە گوتن: ڤایروسێ گەندەلیێ مەترسیدارترە ژ ڤایروسێ کورونایێ؛ هندی ڤایروسێ گەندەلیێ یە و تایبەت ب هەردوو چەقێن دارایی و ئابووری رێکەکا ئێکسەرە بو هەرڤاندنا هەر بنەمایەکێ جوان وباشە دناڤا حکومرانیا چاک دا.
تێبینی: ئەڤ هەر سێ ستوونێن ریێازا بارازنیێ نەمر لسەر هاتینە ئاڤاکرن ب تەمامی یێن هاتینە نڤێسین دپەرتوکا مە دا لسالا 2003 بناڤێ: (پارتی… پێناسە ، هزر ، رێباز) چاپخانا (زانا).
