مشعان جبووری دخوازیت رۆژئاڤایێ ئیراقێ بکەڤیتە سەر ھەرێما کوردستانێ

پشتی ئەندامەکێ جڤاتا نوونەرێن ئیراقێ ژ فراکسیۆنا ھەڤپەیمانییا فەتح یا ھادی عامری سەرۆکاتییا وێ دکەت راگەھاندی، جودابوونا ھەرێما کوردستانێ ژ ئیراقێ بۆ کورد و عەرەبان باشترە، مشعان جبووری، سیاسەتمەدارێ ئیراقی داخواز کر رۆژئاڤایێ ئیراقێ بکەڤیتە سەر ھەرێما کوردستانێ.

سامر زەیبان، ئەندامێ جڤاتا نوونەرێن ئیراقێ ژ فراکسیۆنا ھەڤپەیمانییا فەتح د تۆرا جڤاکی یا فەیسبووکێ دا پۆستەک بەلاڤ کر بوو و راگەھاند بوو، جودابوونا ھەرێما کوردستانێ ژ ئیراقێ بۆ عەرەب و کوردان باشترە، لێ ب مەرجەکی ب شێوەیەکێ دادوەرانە بیت.

ژ ئالیێ خوەڤە مشعان جبووری، سیاسەتمەدار و ئەندامێ پێشتر یێ جڤاتا نوونەران دتویتەکی دا بەرسڤا زەیبانی دا و راگەھاند، سامر زەیبان پێشنیازا جودابوونا ھەرێما کوردستانێ ژ ئیراقێ دکەت داکو ئیراق ببیتە دەولەتەکا زۆرینەیا شیعە، لێ ئەو ژ زەیبانی دخوازیت پێشنیازەکا دی ژی زێدە بکەت کو ھەرێمەکێ بۆ پارێزگەھێن رۆژئاڤایێ ئیراقێ دابمەزرینن و رەنگە وەلاتیێن وێ ھەرێمێ بخوازن بچنە سەر ھەرێما کوردستانێ و دەولەتەکا مەدەنی و فرەنەتەوە و ئایین دا بژین و وەلاتێن جیران ژی قەبوول بکەن.