دەڤەردارێ ئاکرێ: قەستا سەرێ گری نەکەن

مازن محەمەد سەعید دەڤەردارێ بەیانەک ل دۆر هەلکرنا ئاگرێ نەورۆزێ ل ئاکرێ بەلاڤکر و راگەهاند: ئاهنگا نەورۆزێ ل سەرێ گری ل ئارێ ناهێتەکرن و ب تنێ یاریێن ئاگری دێ هێنە بلندکەن.

 ئەڤە ژی دەقێ وی بەیانی یە:

بەیانامەک ژ قائیمەقامییا قەزا ئاکرێ ب هەلکەفتا جەژنا نەورۆزێ

جەژنا نەورۆزێ و سەر سالا کوردی 2721 ل تەڤایا مللەتێ کورد پیرۆز بیت.
ب هەلکەفتا جەژنا نەورۆزێ و سەر سالا کوردی ب ناڤێ دەڤەردارییا قەزا ئاکرێ جوانترین پیرۆزباهییان ل تەڤایا مللەتێ کورد ل هەر چار پارچێن کوردستانێ و جیهانێ ب گشتی وتەڤایا کەس وکارێن شەهیدێن سەربلند و پێشمەرگەهێن قەهرەمان و خەلکێ دەڤەرا ئاکرێ ب تایبەتی دکەین. 

هاوەلاتیێن خوشتڤی

ب ڤێ هەلکەفتا نەتەوەیی داخازێ ژ وەیێن بەرێز دکەین ژ بەر سەلامەتییا گیانێ وەیێ ئەزێز و ژبۆ رێڤەچوونا رێورسمێن ئاگرێ نەورۆزێ ب ئاوایەکێ جوان و سەرکەفتیانە مە ب فەر زانی ئەڤان پێزانین و رێنمایان بۆ وەیێن خۆشتڤی ب دەینە دیارکرن و بەرچاڤ بێنە وەرگرتن.

١-ئاهەنگا نەورۆزێ ناهێتە گێران ب تنێ دێ یاریێن ئاگری هێنە بلندکرن دگەل هەلکرنا خەتیرێن ئاگری.

٢-داخازێ ژ وەلاتیێن خۆشتڤی دکەین قەستا سەرێ گری نەکەن ژبەر بلندکرنا یاریێن ئاگری و سەلامەتییا گیانێ وەلاتییان کو بۆ ماوەیەکێ دیارکری دێ رێک هێتە گرتن.

٣-نابیت ب هیچ شێوەیەکی تەقە بێتە کرن و هەر جهەکێ تەقە لێ بێتە کرن دێ پێرابوونێن یاسایی دگەل هێنە وەرگرتن.
٤-داخازێ ژ خەلکێ خوە دکەین هاریکاربن دگەل هێزێن ئێمناهی و پابەندی رێنمایێن خوە پاراستنێ بن ودویر کەڤن ژ قەلەبالغییێ.

٥-داخازێ ژ هەمی گەشتیاران دکەین وەکو ئەرکەکێ نشتیمانی و ئەخلاقی و ئاینی و ژبۆ پاراستنا جوانییا سیمایێ دەڤەرا مە دەمێ دچنە سەیرانان ژێنگەهی پیس نەکەن و پاقژ راگرن و زبل و خاشاکێن خوە هەلگرن و بداننە جهێن پاشمایان.
٦-هیڤیدارین ئەڤ هەلکەفتە و هەمی هەلکەفتێن دی یێن نەتەوەیی ببنە زنجیرەکا پێگڤە گرێدایی بۆ موکومکرن و هێزبوونا ئێکرێزییا گەلێ مە و ببیتە لاپەرەکێ نوو بۆ پێڤاژویا سیاسییا گەلێ کوردستانێ ل دووماهیێ نەورۆزا وە هەمییا پیرۆزبیت و ب دلەکێ خۆش و ئارام نەورۆزا خوە ب بورینن و هەمی رۆژێن هنگو ب خێر و خوشی بن.

مازن محەمەد
دەڤەردارێ قەزا ئاکرێ