جودابوونا ھەڤژینان کارتێکرنێ ل خواندنا زارۆکان دکەت

دایک و باب ستوونێن سەرەکی یێن پێکئینانا خێزانێ نە، لەوران دەما ژێک ڤەدبن خێزان ژناڤ دچیت و مامۆستایەک ژی دبێژیت: قوربانیێن سەرەکی یێن ژێکڤەبوونا دایک و بابان زارۆکن.
ئێک ژ وان ژنێن ژ ھەڤژینێ خوە جودا بووی دبێژیت: ئەو دایکا چار زارۆکان بوو دەما ژ ھەڤژینێ خو جودابووی، ژێکڤەبوونا وان گەلەک کارتێکرن ل سەر خواندنا زارۆکێن وان کرییە، ھەروەسان بارێ وان یێ دەروونی ژی تێکچوویە و بەردەوام پرسیار بابێ خوە دکەن.
مامۆستا ھەلین داود دیارکر، ژیکڤەبوونا دایک و بابان کارتێکرنێ ل سە ر زارۆکان دکەت و تایبە ت ھەکە قوتابی بیت، حە ز و شیان نابن بۆ خواندنێ ژبەرکو ژلایی دەروونی ڤە نە یێ ئارامە و حەز ناکەت بخوینیت و حەزا داھینانێ نابیت و دڤیت ژ خواندنێ دوورکەڤیت و ھزر دکەت خواندن یا بی مفایە، گەلەک جاران ھەستا غیرە کرنێ و حەسیدیێ بو چێدبیت ژ قوتابیێن دی دەمی دبینیت دایک و بابێن وان پێدڤیێن وان بۆ دابین دکەن و ئەو بێبەھرە ژڤی تشتی تایبە ت بۆ قوتابیێن بنەرەتی، ژبەرکو یێ د ژیەکئ بچووک دا، زارۆک د ڤی ژی دا د پێدڤی ب حەزژێکرن و گرنگیدانێ نە و ل دەمێ ژێکڤەبوونێ ژ وێ حەزژێکرنێ بێبەھر دبن و ڤالاھیەک د ژیانا وان دا پەیدا دبیت، ئەڤە ژی وەدکەت زارۆک ھەست ب کێماسیێ بکەت و دھەمی وارێن ژیانێ دا لاواز ببیت.
ژ ئالییێ خوەڤە ئەحمەد قاسم، شارەزایێ چڤاکی دیارکر، د پروسا ھەڤژینیێ دا دەمێ دایک و باب ژێک ڤە دبن نە بەس کارتێکرن ل سەر وان دھێتە کرن، بەلکو دەوروبەر ژی دبنە قوربان تایبەت ھەکە ئەندامێن خێزانێ نێزیکی ئێک بن، لێ قوربانیدانا ھەرە مەزن زارۆک ددەن، ژبەرکو ژ ڤیانا دایک یان باب بێبەھر دبیت، مخابنی ڤە ژی ھێشتا رەوشەنبیریەکا وەسا د چڤاکی دا پەیدانەبوویە بزانن چاوا سەرەدەریەکا دروست د گەل زارۆکان بکەن، پترییا دایک یان باب یێ زارۆک ل نک وی دمینیت، ئەو لایەن دێ وەسا بۆ زارۆکی دیارکەت کو لایەنێ دی گونەھبارە و دێ کەرب و کینێ ل نک زارۆکان پەیداکەن، ئەڤ چەندە ژی ئەگەرە زارۆک د زارۆکینیا خودا نە ژیت و ھزرا پاشەرۆژا خو نەکەت.

خانی نیوز: مەنیجا ئەیوب