پشتی کو شەڤا دەرباز بووی رێژەیەکا زۆرا بارانێ ل سنوورێ ناحیا شێلادزێ باری، بوویە ئەگەێ وێ چەندێ کو رێژەیەکا باش یا ئاڤا رووبارێ شین بلندبووی و داروبار ل دەڤەرا نێرەوە رێکان دگەل خوە ئیناینە و خەلکێ کۆمەلگەھا سیریێ ژی ھەر ژ سپێدێ قەستا سەر رووبارێ ناڤھاتی کریە بۆ ڤەگرتنا داران.
میرومەر عەبدوللا سیتەی کو ئێک ژ وان ھاولاتییان بوو یێن بەرەف ڤەگەرتنا داران چووی بۆ خانی نیۆز گۆت: پشتی کو رێژەیەکا زۆر یا بارانێ باری ل دەڤەرێ، ئاڤا رووبارێ شین ژی بلند بوویە و دار دگەل خوە ئیناینە ئەو ژی خەلکێ کۆمەلگەھا سیریێ ھاتنە سەر رووباری بۆ ڤەگرتنا داران و ئەڤێ ئاڤ رابوونێ مفا گەھاندییە خەلکی کو بۆ خوە دارا ڤەگرن.
دبەردەوامیا ئاخفتنێن خوە دا ناڤبری گۆت: ھەر ساڵ د ڤی دەمی دا رووبارێ شین رادبیتن و داران دگەل خوە دا دئینیتن و خەلک یێ دزانیت کو ل ڤی دەمێ سالێ دا دێ رووبار داران دگەل خوە ئینیتن، لەورا ھەر ب شەڤێ ئامادەکاریێن خوە دکەن بۆ رۆژا پاشتر .
دھێتە زانین کو دەڤەرا نێروە و رێکان دەڤەرەکا چیایی یە و یا بەردایە دەمێ ڕەنیێن بەفرێ چێدبن نەخاسمە د دۆل و نھاڵا دا داران دگەل خوە دئینن و نێزیکی رووباری دبن، دەما ئاڤا رووباری بلند بیتن، وان داران دگەل خوە دئینیتن.
خانی نیۆز، سامی رێکانی
