حكومەتا هه‌رێمێ دێ راپۆرتا دویێ یا چاكسازیێ هنێریته‌ پەرلەمانى

سەرۆكێ دەستەیا دەستپاكییا ھەرێما كوردستانێ راگەهاند‌، حكومەتا ھەرێما كوردستانێ د ده‌مێ سێ هه‌یڤێن بوورى دا پێنگاڤێن باش بۆ بجهئینانا قانوونا چاكسازیێ هاڤێتینه‌ و راپۆرتا دویێ د قۆناغا دوماهیێ دایه‌، ل ده‌مه‌كێ نێزك دێ رەوانەی پەرلەمانی كه‌ت، ژبه‌ركو حكومەت ل سه‌ر چاكسازیێ رژده‌.

حاكم ئەحمەد ئەنوەر راگه‌هاند‌، حكومەتا ھەرێما كوردستانێ بریار دایە ھەر سێ هه‌یڤان جاره‌كێ راپۆرته‌كێ ده‌ربارەی قانوونا چاكسازیێ رەوانەی پەرلەمانى بكه‌ت، كو بریار بوو ل ڤێ هه‌یڤێ رەوانە بكه‌ت، لێ ژبه‌ر جه‌ژنا نەورۆزێ و  ژبه‌ركو بەرپرسێ فەرمانگەها ھەماھەنگی و دووڤچوونێ ل جڤاتا وەزیران، ئەندامێ شاندێ دانوستانكارە بۆ گوتۆبێژان ل گه‌ل به‌غدا، ئەڤه‌ بووینە ئه‌گه‌رێ گیرۆبوونا رەوانەكرنا راپۆرتا دویێ ده‌ربارەی قانوونا چاكسازیێ، بەلێ ئه‌و راپۆرتە د قۆناغا دوماهییێ دایه‌ و ل ده‌مه‌كێ نێزیك دێ رەوانەی پەرلەمان كه‌ن.

حاكم ئەحمەد گۆت‌ ژى، بجهئینانا برگە و مادێن قانوونا چاكسازیێ بەردەوامی ھەیە و نوكه‌ پێداچوون بۆ دۆسیەیا فەرمانبەران د قۆناغا دوماهیێ دایە، كو ملیۆنه‌ك و 250 هزار فەرمانبەر ھەنە، ژ وان ژى 800 هزار فەرمانبەرن و ئەوێن دیتر خانەنشین و رێڤەبەرێن گشتینه‌، ل گه‌ل هەموو ئەوێن مووچەى وه‌ردگرن ل سەرجەم سێكتەرێن دیتر، ئه‌و هه‌موو دێ هێنه‌ رێكخستن و دێ پێداچوونه‌كا ته‌مام تێدا هێته‌ كرن، ب تنێ ئه‌و دێ مینن، ئه‌وێن شایسته‌ى هندێ بن مووچه‌ى وه‌ربگرن.

سەرۆكێ دەستەیا دەستپاكیێ ئه‌و ژى گۆت: ھنده‌ك پرسێن دناڤا وى قانوونێ دا پێدڤى ب بریارا سیاسی و ھه‌ڤكارییا لایەنێن سیاسی ھەیە، له‌وما حكومەت د راپۆرتا خوه‌ دا بۆ پەرلەمانى، دی به‌حسێ ھەموو هووركاتى و پێنگاڤان كه‌ت، د ده‌مێ ئه‌ڤان سێ هه‌یڤێن بوورى، داكو پەرلەمان و خەلك ژى ئاگه‌هداری چاكسازیێن حكومەتێ بن.

حاكم ئەحمەد ئەنوەرى، سه‌رۆكێ ده‌سته‌یا ده‌ستپاكیێ ل هه‌رێما كوردستانێ ئاشكرا كر، حكومەتا ھەرێما كوردستانێ د ھەموو سێكتەران دا گاڤێن باش هاڤێتینه‌ د وارێ چاكسازیێ دا و دێ بەردەوام  بیت هه‌تا هه‌موو برگە و ماده‌ دهێنه‌ بجهئینان.