د راگه‌هاندنه‌كا سه‌رۆكایه‌تییا هه‌رێما كوردستانێ دا هیته، نێچیرڤان بارزانی سه‌رۆكێ هه‌رێما كوردستانێ پێشوازی ل شانده‌كێ سه‌ربازیێ بالیۆزخانه‌یا ئه‌مریكا ل به‌غدایێ كر.
سه‌رۆك نێچیرڤان بارزانی سوپاسى و پێزانین خوه بۆ هه‌ڤپه‌یمانان د شه‌ڕی دژی داعشدا دیاركر، و جه‌خت ل پێدڤیاتییا به‌رده‌وامییا ئه‌رکێ ئه‌مه‌ریکا و هه‌ڤپه‌یمانان ل ئیراقێ بۆ بنبڕكرنا تیرۆرێ كر مه‌ترسییا تیرۆرێ و سه‌رهه‌ڵدانا داعشێ و هه‌ماهه‌نگییا هه‌ولێر – به‌غدا و هه‌ڤپه‌یمانان و پڕكرنا بۆشاییا ئێمناهیێ ب پێدڤى زانی.
نێچیرڤان بارزانى سه‌رۆكێ هه‌رێما كوردستانێ، نیڤرۆیا ئه‌ڤرۆ چوارشه‌مبى 1-4-2021ێ پێشوازى ل جه‌نه‌رال جۆن تایگه‌رت، مه‌زنه شیره‌تكارێ سه‌ربازیێ بالیۆزخانا ئه‌مریكا ل به‌غدا و شانده‌كێ د گه‌ل دا كر.
د كۆمبوونێ دا كو كونسولێ گشتیێ ئه‌مریكا ل هه‌ولێرێ و وه‌زیرێ كاروبارێن پێشمه‌رگه‌ى و به‌رپرسێن سه‌ربازیێن هه‌ردوو لایان ئاماده‌ببوون، شاندێ مێهڤان پیرۆزباهییا وان كرن ب هه‌لكه‌ڤتا ده‌ربازبوونا یاسایا بۆدجه‌یا ئیراقێ ل جڤاتا نوونه‌ران، و هه‌ڤبه‌شییا پێشمه‌رگه‌ى و هه‌ڤپه‌یمانان دووپاتكرییه، و رۆلێ پێشمه‌رگه‌ى و وه‌زاره‌تا پێشمه‌رگه‌ى به‌رز نرخاند.
ژلایێ خوه ڤه سه‌رۆك نێچیرڤان بارزانى تێپه‌راندنا بۆدجه‌ى ب پێنگاڤه‌كا گرنگ بۆ ئیراقێ و هه‌رێما كوردستانێ وه‌سفكر و جه‌خت ل سه‌ر زێده‌تر گرنگیدان ب په‌یوه‌ندیێن سیاسى و ئابوورى و سه‌ربازیێن ئیراقێ و هه‌رێما كوردستانێ ل گه‌ل ئه‌مریكا كر.
هه‌لبژارتنێن ئیراقێ و كاریگه‌رییا پێلا نوو یا كۆرۆنایێ ل سه‌ر هه‌رێما كوردستانێ و جیهانێ و چه‌ند بابه‌ته‌كێن دى كو جهێ گرنگى پێدانا هه‌ڤپشك بوون، لایه‌نه‌كێ دی یێ كۆمبوونێ بوون.
