زاخۆ :رۆژانە 20 کەس تووشی ڤایرۆسێ کۆرۆنایێ دبن

ژدەستپێکا به‌لاڤبوونا پەژیکا کۆرۆنایێ و هەتا نها (٣٨٩١) کەس ل باژێرێ زاخۆ تووشى ڤایرۆسێ کۆرۆنایێ بووینه‌ و نها ل بنگەهێن تاییەت یێن سەر ب رێڤەبەریا ساخلەمیا زاخۆ ڤە پشکنین بێ بەرامبەر بۆ وەلاتیان دهێنە كرن.
ئەمیر عەلی، بەرپرسێ راگەهاندنا ساخلەمیا زاخۆ بۆ خانی نیوز راگەهاند، نها دو بنگەهێن وەرگرتنا سەمپلان ل زانکۆیێ و نەخۆشخانا تەنگاڤیان ل زاخۆ دخزمەتا وەلاتیان دانە و بێ بەرامبەر.

ئەمیر عه‌لى ئاشكرا كر، دەمێ (٢٤) سه‌عه‌تان دا نێزیکی (٢٠٠)سەمپلا دهێنە وەرگرتن و ژ وان سەمپلا (٢٠)کەس تووشی پەژیکا کۆرۆنایێ دبن، لێ پتریا وان پێدڤی ب هەناسا دەستکرد نەبووینە.

ل دۆر وەرگرتنا قورچا ئێکێ یا ڤاکسینى، بەرپرسێ ڕاگەهاندنا ساخلەمیا زاخۆ گۆت: هەتا نها پتری (٢٠٠) كه‌سان ب رێکا ئۆنلاین ناڤێن خوە تۆمارکرینە و قورچا ئێکێ یاڤاکسینى وەرگرتیە، گۆت ژى: ژ دەستپێکێ هەتا ئەڤرۆ روژا ئەینیێ (٣٨٩١) کەس ل زاخۆ تووشی پەژیکا کۆرۆنایێ بووینە و هیڤیە خەلک پێگیریێ ب رێنمایان ببن و خوە بپارێزن، ژبەرکو باشترین رێک بۆ بەرسینگگرتنا کۆرۆنایێ خوە پارێزی یە .

خانی نیوز، نزارمەجید: