كه‌نه‌دا دێ كوردێن ئێزیدى وه‌كو په‌نابه‌ر وه‌رگریت

كه‌نه‌دا پلانا خوه‌ بۆ ئاكنجیكرنا سه‌دان په‌نابه‌رێن كوردێن ئێزیدى و رزگاربوویێن ده‌ستێ داعشێ راگه‌هاند.

ماركۆ میندیسینۆ، وه‌زیرێ كۆچ و كۆچبه‌ران و ره‌گه‌زناما كه‌نه‌دا سیاسه‌ته‌كا نوو ژ بۆ پێشوازیكرنا ئێزیدییان راگه‌هاند، وه‌ك بزاڤه‌ك بۆ كۆمكرنا په‌نابه‌ران دگه‌ل رزگاربوویێن دیێن خێزانێن وان ل وى وه‌لاتى.

ماركۆ میندیسینۆ د راگه‌هاندنا خوه‌ دا گۆت: ئه‌و كه‌سێن كه‌نه‌دا دێ پێشوازییا وان كه‌ت ئه‌وێن ژ ده‌ستێ داعشێ و ئه‌شكه‌نجه‌ و جینۆساید و كۆمكوژییان رزگاربووین كۆ ئێزیدى و هنده‌ك ژ په‌نابه‌رێن لاواز و بێ ده‌ستهه‌لات یێن جبهانێ نه‌.

كوردێن ئێزیدى ژلایێ رێكخستنا داعشێ یا تیرۆرستى ڤه‌ تووشى جینۆسایده‌كا مه‌زن بوون و زێده‌ترى 3000 كه‌سان هاتنه‌ كۆشتن و ب كێمى 7000 ژنێن كوردێن ئێزیدى هاتنه‌ ئێخسیركرن و ژ ده‌ڤه‌رێن وان هاتنه‌ ده‌ربه‌ده‌ركرن.

ل گۆره‌ى نووچه‌یێن رادیۆیا كه‌نه‌دا یا ناڤده‌وله‌تى، وه‌لاتێ كه‌نه‌دا ژ سالا 2017ێ تا نها نێزیكى 1400 رزگاربوویێن ده‌ستێ داعشێ ئاكنجیكرینه‌ كۆ پتریا وان ژنن.