مایتێکرنا ئالیێن سیاسی د دۆسەیێن گەندەلیێ دا ھەیە

ئەندامەکێ لژنا دەستپاکیێ ل پەرلەمانێ کوردستانێ ئاشکراکر، ئالیێن سیاسی ل کوردستانێ مایتێکرنێ د کاروبارێن دادگەھان دکەن، تایبەت کێشێن گەندەلیێ، لەوما ژی داخازا دروستکرنا دادگەھەکا تایبەت ب گەندەلیێ ڤە کریە.

سەعید مستەفا تەتەرخان، جێگرێ سەرۆکێ لژنا دەستپاکیێ ل پەرلەمانێ کوردستانێ بۆ خانی نیوز ئاشکراکر، ئەو بەرپرسێن تۆمەتبار ب گەندەلیێ دھێنە بەر دادگەھێ سەر ب ئالیەکێ سیاسی نە و دەمێ دھێنە بەرسینگێ دادگەھێ مایتێکرنا حزبی د وان کەیسان دا دھێتەکرن.

تەتەرخان بەرھەڤ نەبوو ھەژمارا وان کەسان دیار بکەت یێن ب گەندەلیێ چووینە بەرسینگێ دادگەھێ و گۆت: بۆ پتر دادپەروەری بھێتەکرن پێشتر وان بزاڤ کرینە دادگەھەکا تایبەت بۆ بەرھنگاربوونا گەندەلیێ بھێتە دانان، جڤاتا  دادوەری بریار دایە ئەو دادگەھـ بھێتە دانان و وەکو قانوون ژی داخواز کریە ھەمان بریار بھێتە بجھئینان، ئەو کەیسێن ل دھۆک و سلێمانیێ بھێنە نەچارکرن بۆ ڤێ دادگەھێ بھێنە رەوانەکرن و ھەکە دادگەھـ نەبیت چ دادپەروەری تێدا نینە و پتر کارتێکرنا کەساتیا تێدا ھەیە.

تەتەرخانی زێدەتر گۆت: دڤێت پتر پشتەڤانیا دەستپاکیێ بھێتەکرن دا پێدڤی ب چ کەسان نەبیت و پشتبەستنێ ل سەر خوە بکەت و ئەکتیفتر بیت.

خانی نیوز، سالار محەمەد دۆسکی: