سهرۆكێ ههرێما كوردستانێ ب ههلكهفتا بیروهرییا 33 سالییا ئهنفالان پهیامهك بهلاڤكر و راگههاند، ئهنفال ئێك ژ درندهترین تاوانێن رژێما بهرێ یا ئیراقێ بوون كو بێ جوداهى سهدان هزار ژن، زهلام، زارۆ و پیرێن بێ گونههـێن كوردستانێ هنارتنه بیابانێن بێمهفهرێن مرنا ب كۆم و گران، ههروهسا بێ ئهگهر زێدهتر ژ 182هزار وهلاتى ب كۆم كوشتن و بنئاخ كرن و ژینگههـ و سروشتێ جوانێ كوردستانێ وێرانكر و شوونوارێن ژیانێ ب ئێكجارى ل هزاران گوند و باژارێن كوردستانێ نههێلان.
نێچیرڤان بارزانى د پهیاما خوهدا ئاشكرا كر، ب ڤێ ههلكهفتێ سهرێ رێزێ و نهوازشێ ل ههمبهر گیانێ پاكێ شههیدان دچهمینن، ب رێز و تهقدیر دێ بیرهوهریا وان ساخ كهن و ههمى دهما دێ زیندى دناڤا ههلكهفتێن گهلێ كورد دا مینن، سلاڤ و رێز بۆ مالبات و كهسوكارێن سهربلندێن وان هنارتن، كو شیاین خوه لبهر ڤێ ئازارا ب ئێش و گران بگرن، پێدڤیه ئهوا د شیان دا خزمهتا زێدهتر و باشتر پێشكێشى كهسوكارێن شههیدان بهێته كرن.
نێچیرڤان بارزانى گۆت ژى: بیرهوهریا شههیدان و دیرۆكا پرى خۆین بلا ببن هاریكار بۆ ئێكگرتن و ئێكرێزیێ و ههمى پێكڤه كاربكهین داكو چ كارهساتێن ب ڤى رهنگى ب سهر گهلێ كوردستانێ و چ جهان ب سهر مروڤایهتیێ دا نههێن.
نێچیرڤان بارزانى، سهرۆكێ| ههرێما كوردستانێ گۆت ژى: پشتى دادگهها بلندا تاوانان ل ئیراقێ ئهنفال ب جینوساید و تاوانا دژى مرۆڤاتیێ و تاوانا شهرى دایه نیاسین، پێدڤیه دهولهتا ئیراقێ كهسوكارێن قوربانیان ژ لایێ ماددى و مهعنهوى ڤه قهرهبۆ بكهت و داخواز كر ئهركێ قانوونى و ئهخلاقى بجهبینن، ههروهسا جڤاكا ناڤدهولهتى وان تاوانان ب جینۆساید بدهته نیاسین و پێدڤیه ئهو تاوان ل ناڤا پروگرامێن خواندنێ و ل ههمى جهان بهێته دکیومێنتكرن.
