نێچیرڤان بارزانى و بالیۆزێ توركیا كۆم بوون

سه‌رۆكێ هه‌رێما كوردستانێ پێشوازى ل بالیۆزێ توركیا ل ئیراقێ كر یێ ب هه‌لكه‌فتا داوى هاتنا ئه‌ركێ وى ل ئیراقێ سه‌ره‌دانا هه‌ولێرێ كرى.

نێچیرڤان بارزانى ئه‌ڤرۆ پێشوازى ل فاتح یلدز، بالیۆزێ توركیا ل به‌غدا كر و سوپاسى و ده‌ستخۆشى بۆ ئه‌رك و خزمه‌تێن وى ل ئیراقێ و بزاڤێن وى بۆ پێشڤه‌برنا په‌یوه‌ندیێن وه‌لاتێ وى د گه‌ل ئیراقێ كرن، هیڤیا سه‌ركه‌فتنێ ژى بۆ وى د ئه‌ركێ وى یێ نوو دا خواست.

فاتج یلدز، بالیۆزێ توركیا ل به‌غدا سوپاسییا وێ هه‌ڤكارى و هه‌ماهه‌نگییا د ده‌مێ كارێ وى دا هاتیه‌ كرن بۆ هه‌موو ئالییه‌كى كر، هیڤى ژى خواستن په‌یوه‌ندیێن توركیا د گه‌ل ئیراق و هه‌رێما كوردستانێ ل سه‌ر بنه‌مایێ رێزگرتن و په‌رژه‌وه‌ندیێن هه‌ڤپشك و جیرانییه‌كا باش د هه‌موو واره‌كى دا پێشڤه‌ بچن.

نێچیرڤان بارزانى و فاتح یلدز ره‌وشا ده‌ڤه‌رێ ب گشتى و رێككه‌فتنا شنگالێ ب تایبه‌تى و چه‌ندین پرسێن دى گۆتوبێژ كرن.