نامه‌یه‌ك ژ سه‌رۆكێ هه‌رێما كوردستانێ بۆ جڤاكا ناڤده‌وله‌تی

د نامەیەکا فەرمی دا بۆ بەڕێز ئەنتۆنیۆ گۆتێرێس سکرتێرێ گشتییێ نەتەوەیێن یەکگرتى و هه‌ر ئێك ژ وه‌ڵاتێن ئەندام د جڤاتا ئاسایشا ناڤدەوڵەتی دا، نێچیرڤان بارزانى، سەرۆکێ هەرێما کوردستانێ چەند داخازییه‌ك ئاراستەی کۆمەڵگەها ناڤدەوڵەتی کر.

د نامەیه‌کێ دا بارزانی داخواز دکه‌ت هنارتییا سکرتێرێ گشتییێ نەتەوەیێن ئێکگرتى ل ئیراقێ دەسهەڵاتا زێده‌تر پێ بهێته‌ دان و ڕۆڵێ زێده‌تر هەبیت ل ناڤه‌ندگیرییا د ناڤبه‌را  حکومەتا فیدراڵ یا ئیراقێ و حکومەتا هەرێما کوردستانێ بۆ چارەسەرکرنا ئاریشان ب تایبەتی جێبەجێکرنا ماددەی 140ى دەستوورى و ئاریشێن نەفت و دابەشکرنا داھاتى.

سه‌رۆكێ هه‌رێمێ د نامه‌یا خوه‌ دا پشته‌ڤانییێ ل داخوازیێن حکومەتا فیدراڵى یا ئیراقێ ل جڤاتا ئاسایشا ناڤدەوڵەتی دکه‌ت بۆ زێده‌كرنا ڕۆڵێ نەتەوەیێن ئ|ئێکگرتیى بۆ چاڤدێریکرنا هەڵبژارتنان ل ئیراقێ و پشت راستبوون ژ هندێ كو هه‌لبژارتنێن هه‌یڤا ئۆكتۆبه‌را ئه‌ڤ ساله‌ ب باشى و دوور ژ پێشیلكارییان ب رێڤه‌ دچیت.

سەرۆک نێچیرڤان بارزانى، هەروەسا داخواز دکه‌ت ل دەقێ پرۆژەبڕیارا نوویا جڤاتا ئاسایشا ناڤدەوڵەتیدا دەربارەی ئیراقێ، پشته‌ڤانییا فەرمییا جڤاتا ئاسایشا ناڤدەوڵەتى هەبیت بۆ جێبەجێکرنا ڕێککەڤتنا ڤێ داوییێ یا د ناڤبه‌را حکومەتا فیدراڵ یا ئیراقێ و حکومەتا هەرێما کوردستانێ دەربارەی بۆدجە و دانوستاندن ل سەر ته‌ماما پرسەیێن هه‌لاویستى.

د خاڵه‌كا دی یا نامه‌یێدا داخواز هاریكاریێن مرۆڤى و پشتگیرییا زێده‌تربكه‌ت بۆ ئاواره‌ێن هه‌رێما كوردستانێ و باشتر كرنا ژیانا وان د ناڤ كه‌مپان دا.