سه‌رۆكێ هه‌رێما كوردستانێ ئه‌ڤرۆ پێشوازى ل بالیۆزێ ڤاتیكانێ ل ئیراقێ كر، یێ پشتى ده‌ست بكاربوونا خوه بۆ جارا ئێكێ یه ب فه‌رمى سه‌ره‌دانا هه‌رێما كوردستانێ دكه‌ت.
نێچیرڤان بارزانى ب خێرهاتن و پیرۆزباهی ل میتیا لێسكوڤار، بالیۆزێ نوو یێ ڤاتیكانێ ل ئیراقێ كرن و په‌یوه‌ندیێن هه‌رێما كوردستانێ دگه‌ل ڤاتیكانێ گۆتوبێژ كرن.
سه‌رۆكێ هه‌رێما كوردستانێ سه‌ره‌دانا قه‌داسه‌تا پاپاى بۆ هه‌رێما كوردستانێ ب روودانه‌كا دیرۆكى ل قه‌له‌م دا و هیڤی خواست ببیته هانده‌ر بۆ ڤه‌گه‌ریانا وان مه‌سیحیێن ژ ئه‌گه‌رێ شه‌رى و توندوتیژیێ ل سالێن بوورى وه‌لاتێ خوه ب جهـ هێلاى.
نێچیرڤان بارزانى ڤه‌كرنا زانكۆ یا كاسولیكى ل عنكاوه ب گاڤه‌كا گرنگ و ئه‌رێنى ل قه‌له‌م دا و دوپات كر كو په‌روه‌رده بناغێ سه‌ره‌كى یێ جڤاكێ باش و پێشكه‌فتیه، ژبه‌ر وێ یه‌كێ پێدڤیه گرنگى ب كوالتیا خواندنێ و كولتورێ پێكڤه‌ژیانێ و گیانێ لێبورینێ هه‌بیت و زانكۆ تۆره‌كا په‌یوه‌ندییان دگه‌ل زانكۆیێن جیهانى دروست بكه‌ن داكو مفاى ژ ئه‌زموونا وان یان سه‌ركه‌فتنێ ببینن.
بالیۆزێ ڤاتیكانێ ل ئیراقێ سوپاسی یێن ڤاتیكانێ گه‌هاندنه هه‌رێما كوردستانێ و ئاماژه ب وێ چه‌ندێ كر كو ڤاتیكان رێز و ستایشه‌كا مه‌زن ل هه‌لویست و كولتورێ پێكڤه‌ژیانێ و ئێكدۆ قه‌بوولكرن ل هه‌رێما كوردستانێ دگریت و سوپاسی و ده‌ستخۆشى ل سه‌رۆكێ هه‌رێما كوردستانێ و به‌رپرس و گه‌لێ كوردستانێ كر بۆ پێشوازیا وان یا گه‌رم ل قه‌داسه‌تا پاپایێ ڤاتیكانێ.
