پارێزگارێ بەسرە: هەولێر ب پاره‌یێ بەسرا نه‌هاتییه‌ ئاڤه‌دانكرن

ئەسعەد عیدانی پارێزگارێ بەسرا د دیداره‌كا کەنالێ شەرقییە دا، د به‌رسڤا پرسیاره‌كێ دا، ده‌ربارەی وان دەنگۆیێن ل دژی هەرێما كوردستانێ دهێنه‌ به‌لاڤكرن، ب تایبەتی ئەوێن دبێژن هەولێر ل سەر حسێبا بەسرە هاتییه‌ ئاڤەدان كرن، دبێژیت، ب هەموو شێوەیان دژی وێ بۆچوونێ مه‌ یا دبێژن ب بۆدجە و پاره‌یێ بەسرا هەولێر هاتییه‌ ئاڤەدان كرن، ئه‌رێ ئه‌م هاتینه‌ باژێرێ خوه‌ ئاڤه‌دان بكه‌ین و هەرێمێ رێگری ل مه‌ كربیت؟ تشتێ هوسا نینه‌، ئاریشه‌ ژ مه‌ ب خوه‌یه‌، پێدڤییە كار بكەین و خەلكێ خوه‌ رازى بكەین و باژێرێ خوه وەکو هەولێرێ ئاڤەدان بکەین”.

هه‌ره‌سا گۆت ژى، ئێك ژ وان كه‌سێن گه‌له‌ك هاریكارییا مه‌ كرى د. فوئاد حسێن بوویە، ل وى ده‌مێ وەزیرێ دارایی یێ ئێراق، ل سەردەمێ وى دا وى زۆرترین پاره بۆ پڕۆژێن بەسرا هاتینە، د ده‌مه‌كی دا ئه‌و سەر ب هەرێما کوردستانێ بوویە و ئەگەر وه‌سابا، دا رێگریێ كه‌ت كو پاره‌ بۆ به‌سرا بچن، نه‌كو به‌رۆڤاژى.

عیدانی گۆت ژى، ئه‌گه‌رێ خرابیا ره‌وشا به‌سرا خرابییا پلاندانانێ و برێڤه‌برنێ یه‌، لێ ئه‌ڤێ چه‌ندێ د ئێخنه‌ ستوویێ هەرێما كوردستانێ و دبێژن هەولێر ب پاره‌یێ بەسرا هاتییه‌ ئاڤەدان كرن، ئەگەر راست دبێژن، وەرن ب پاره‌یێ بەسرا، باژێرێ بەسرا ئاڤەدان بكەن.

پارێزگارێ بەسرا گۆت ژى، ئه‌ز ل گه‌ل هندێ مه‌ كو هەرێما کوردستانێ د بۆدجەى دا مافێ خوه‌ وه‌ربگریت، ل گەل هندێ دڤێت مافێ بەسرا ژى بهێته‌ دان.