رێکخستنا نەتەوەیێن ئێکگرتی یا پەروەردێ و زانست و رەوشەنبیری یونسکۆ، دو جھێن کوردستانی ئێخستنە د لیستا بەروەخت یا کولتورێ جیھانی دا.
وەزارەتا رەوشەنبیری و گەشتوگوزارێ ل تورکیا د بەیانەکێ دا راگەھاند، رێکخستنا پەروەردە و زانست و رەوشەنبیری یا سەر ب نەتەوەیێن ئێکگرتی ڤە یونسکۆ، باژارکێ ئەگین یێ دیرۆکی یێ سەر ب پارێزگەھا ئەرزینجانێ ڤە و کەنیسە و دێرێن کەڤنێن چەرخێن ناڤین ل سنۆرێ باژارکێ میدیاتێ سەر ب پارێزگەھا مێردینێ ڤە ل باکورێ کوردستانێ، ئێخستنە د لیستا بەروەخت یا کولتورێ جیھانی دا.
رێکخستنا یونسکۆ وان جھێن رەوشەنبیری و سروشتی دئێخیتە د لیستێن بەروەخت و بەردەوام دا یێن ساخلەت و بھایێن بلند و ساخلەتێن ئێکانە ھەین کو ل چ جھێن دی نەبن، ب وێ یەکێ ژی گەلەک کەس ل سەرانسەری جیھانێ بزاڤان دکەن سەرەدانا وان جھان بکەن دا ژ نێزیک ببینن.
