وه‌زیرێ پێشمه‌رگه‌ى د گه‌ل شیره‌كارێ بلند یێ سه‌نته‌رێ هه‌ماهه‌نگییا هه‌ڤپه‌یمانان و شاندێ ل گه‌ل دا كۆمبوو و پرسا مه‌شق و راهێنانان، هه‌ڤكاری و هه‌ماهه‌نگییا هه‌ڤپشك یا دناڤبه‌را هه‌ڤپه‌یمانان و هێزێن پێشمه‌رگێ كوردستانێ دا هاتنه گوتۆبێژ كرن و وەزیرێ پێشمەرگەى گۆت: دێ پرۆسا خوه رێكخستنێ و ریفۆرما سه‌ربازی چڕتر لێكه‌ن.
شۆرش ئیسماعیل، وه‌زیرێ پێشمه‌رگه‌یێ حكومه‌تا هه‌رێما كوردستانێ د گه‌ل كۆلۆنێل ده‌یڤید ولیام، شیره‌تكارێ بلند ل سه‌نته‌رێ هه‌ماهه‌نگییا هه‌ڤپه‌یمانان و كۆلۆنێل كلین و شاندێ ل گه‌ل دا كۆمبوو، شۆرش ئیسماعیلى د وێ كۆمبوونێ دا گۆت: ره‌وشا نوكه یا ده‌ڤه‌رێ و مه‌ترسیێن تیرۆرێ و لڤینێن ڤێ داویێ یێن تیرۆریستان ل ده‌ڤه‌رێن كوردستانی یێن ده‌ر‌ڤه‌ی ئیدارا هه‌رێما كوردستانێ، دخوازیت پرۆسا رێكخستنێ و پرسا چاكسازیێ ل وه‌زاره‌تا پێشمه‌رگه‌ى ب له‌زتر بهێته كرن، گاڤێن ڤێ پرۆسێ ژى بهێنه كورت كرن ب هه‌ڤكارییا هه‌ڤپه‌یمانان.
ل دووڤ راگەهاندنا وەزارەتا پێشمەرگه‌ى، شیره‌تكارییا بلند یا سه‌نته‌رێ هه‌ماهه‌نگییا هه‌ڤپه‌یمانان دوپات كرییه، كو هه‌ڤپه‌یمان د هه‌ماهه‌نگییا هێزێن پێشمه‌رگه‌ى دا ل هه‌موو سێكته‌ران دێ د به‌رده‌وام بن.
