ناڤەندا خانی یا رەوشەنبیری سالڤەگەرا ٢٩ێ یا تێلەڤزیۆنا دھۆک ل ھەموو کارمەند و بینەر و جامەوەرێ کوردستانێ پیرۆز کر. ناڤەندا خانی یا رەوشەنبیری و راگەھاندنێ پەیامەک ب ھەلکەفتا دەربازبوونا ٢٩ سالان ل سەر دامەزراندنا تێلەڤزیۆنا دھۆک بەلاڤکر و تێدا پیرۆزباھی ل ھەموو کارمەند و بینەر و جەماوەرێ کوردستانێ ب گشتی و یێ پارێزگەھا دھۆکێ ب تایبەتی کر. ناڤەندا خانی یا رەوشەنبیری و راگەھاندنێ د پەیاما خوەدا ئاشکرا کر، تێلەڤزیۆنا دھۆک وەکو پێدڤیەکا میدیایا سەردەمیانە ب بریارا سەرکردایەتیا پارتی و سەرۆک بارزانی ھاتیە دامەزراندن، داکو خزمەتا بزاڤا سیاسی و جڤاکی و روشەنبیری و میدیایی بکەت و پەیامێ باشتر و جوانتر بگەھینیت. گۆت ژی: ھەر ژ دەستپێکا دامەزراندنا تێلەڤزیۆنا دھۆک ل رۆژا ٣/٥/١٩٩٢ و تا نھا خزمەتەکا باش یا راگەھاندنا کوردستانێ و جەماوەرێ دەڤەرێ کرییە، د سالێن سەخت و دوژار ژی دا دەست ژ کار و خەباتێ بەرنەداییە و بوویە جھێ باوەرییا خەلکێ کوردستانێ. ناڤەندا خانی یا رەوشەنبیری و راگەھاندنێ ئاشکرا کر، تێلەڤزیۆنا دھۆکێ وەکو قوتابخانەیەکا پێگەھاندنا رۆژنامەڤان و میدیاکارێن خودان شیان بوویە کو ل وی دەمی چ سازیێن ئەکادیمی بۆ پێگەھاندنا میدیاکار و رۆژنامەڤانان ل کوردستانێ نەبوون، تێلەڤزیۆنا دھۆکێ د درێژییا کارێ خوەدا خزمەتەکا بەرچاڤ پێشکێشی ھەموو تەخێن جڤاکی ژ زارۆک و ژن و گەنجان و ھەموو پێکھاتەیێن نەتەوەیی و ئایینی یێن کوردستانێ کرییە. دوبارە پیرۆزباھیێ ل ھەموو کارمەند و بینەرێن تێلەڤزیۆنا دھۆکێ دکەین، د وێ باوەریێ ژی دانە کو دێ ل سەر کار و خەباتا خوە بۆ دۆزا رەوایا گەلێ کوردستانێ و پێشخستنا جڤاکی بەردەوام بیت.
