پارتى: پێدڤییه‌ رێز ل سازیێن دادوه‌رى و سه‌روه‌رییا قانوونێ بهێته‌ گرتن

مه‌كته‌با سیاسییا پارتییا دیمۆكراتا كوردستانێ په‌یامه‌ك ل دۆر كارڤه‌دانا كه‌یسا سزادانا چه‌ندین كه‌سان به‌لاڤكر و دوپات كر، چه‌ند ئالییان كارڤه‌دانه‌كا دوور ژ به‌رچاڤگرتنا سه‌روه‌رییا قانوونێ و رێكارێن ده‌ستهه‌لاتا دادوه‌رى نیشان دایه‌ و پێدڤییه‌ رێز ل داموده‌زگه‌هێن دادوه‌رى و سه‌روه‌رییا قانوونێ بهێته‌ گرتن.

مه‌كته‌با سیاسییا پارتى د په‌یاما خوه‌دا ئاشكرا كر، ده‌ستوه‌ردان د كاروبارێن دادگه‌هان و سیاسیكرنا بابه‌تان مفاى ل ره‌وشا نها ناكه‌ت، مه‌رج ژى نینه‌ هه‌كه‌ بۆچوونا ئالییه‌كێ نه‌بیته‌ بریار رامانا وێ نه‌دروستییا بریارێ یه‌.

گۆت ژى: ئه‌وا رووداى یا ئاشكرایه‌، پشتى ڤه‌كۆلینا قانوونى ژ ئالییێ قانوونێ و ئالیێن په‌یوه‌ندیدار هاتیه‌ كرن و پشت به‌ستن ب به‌لگه‌یێن به‌رده‌ست هاتیه‌ كرن وه‌سا دیار بوویه‌ كو چه‌ند كه‌سان بزاڤا تێكدانا سه‌قامگیرى و ئاساییشا هه‌رێما كوردستانێ كرییه‌، له‌ورا باشتره‌ بهێلن سازیێن قانوونى كارێ خوه‌ بكه‌ن و رێزێ ل كارێ وان بگرن.

مه‌كته‌با سیاسییا پارتییا دیمۆكراتا كوردستانێ ئاشكرا ژى كر، هه‌كه‌ بزاڤ ب ڤێ ئاراسته‌یێ بچن و بابه‌ت بهێنه‌ سیاسیكرن و زێده‌تر وه‌كو بانگه‌شه‌یا هه‌لبژارتنان و تێكدانێ بێخنه‌ به‌رچاڤێ وه‌لاتییان، ئه‌و ژى وه‌كو پارتییا دیمۆكاتا كوردستانێ گه‌له‌ك بابه‌ت هه‌نه‌ به‌حس بكه‌ن، هیڤى ژى خواستن پاراستنا سه‌قامگیرى و ئاساییشا هه‌رێما كوردستانێ ل به‌رى هه‌موو بزاڤێن دى بكه‌ڤن.