یونیتاد: كۆمكوژیا ئێزدییان ژلایێ داعشێ ڤه‌ دێ پشتراست كه‌ین

تیما ڤه‌كۆلینێن نه‌ته‌وه‌یێن ئێكگرتى راپورتا خوه‌یا شه‌شێ پێشكێشى جڤاتا ئاساییشا ناڤده‌وله‌تى كر و راگه‌هاند، داعشێ چه‌كێ كیمیایى ل سه‌ر زینداییان تاقیكرییه‌.

رۆژا 5-5-2021ێ خوێندنا ئێكێ بۆ پرۆژه‌قانوونا  دادگه‌ها تاوانان یا تایبه‌تمه‌ند ب تاوانێن داعشێ ل په‌رله‌مانێ كوردستانێ هاتبووكرن.

كه‌ریم خان، سه‌رۆكێ ده‌سته‌یا نه‌ته‌وه‌یێن ئێكگرتى یا تایبه‌ت ب ڤه‌كۆلینێن تاوانێن داعشێ ل ئیراقێ و سووریێ ئه‌ڤرۆ 10-5-2021ێ راگه‌هاند، ئه‌و پشته‌ڤانیێ ل قانوون و دامه‌زراندنا دادگه‌ها تاوانان ل دۆر تاوانێن ناڤده‌وله‌تیێن داعشێ دكه‌ن.

کەریم خان ل دۆر پێشڤه‌چوونا كارێن وان ل ئیراقێ راگه‌هاند، پتریا پێشڤه‌چوون و چالاكیێن وان دو ئه‌گه‌رێن سه‌ره‌كى هه‌نه‌، ژ وانا نووكرن و هه‌ڤكارى و ره‌نگڤه‌دانا وێ هه‌ڤكارییا باشا حكومه‌تا ئیراقێ و به‌رپرسێن هه‌رێما كوردستانێ یه‌.

داوى راپۆرتا تیما ڤه‌كۆلینێن نه‌ته‌وه‌یێن ئێكگرتى ل 11 چرییا دویێ یا بوورى به‌لاڤكربوو، ئه‌و راپۆرت ژى یا تایبه‌ت بوو ب كارێن تیمێ ڤه‌ و ئه‌و به‌لگه‌یێن كۆمڤه‌كرین ل شه‌شى مه‌هێ به‌رى ده‌مێ به‌لاڤكرنا راپۆرتێ، ئانكو ل هه‌یڤا گولانا 2020ێ هه‌تا چرییا دویێ یا هه‌مان سال.