شەرێ فه‌لستینی و جوهیانە و ترترا کوردێ بێ دەولەتە
كيش وه‌لاتێ بوسرمانان و چەند بوسرمانێن نە کورد پشتگیریا خوە بۆ خەلکێ بوسرمانێ تەپەسەرێ هەرێمێ راگەهاند کو داخوازا سه‌رخوه‌بوونا خوە ژ وەلاتەک سەد سالا ژێ دکوژیت کر؟
چەند برایێن تە یێن جیهادی د هاوارا تە هاتنە کۆبانێ و کەرکووکێ و خانەقین دەمێ تو هاتی سەرژێکرن؟
چەند بوسرمانێن عەرەب هاتنە هاوارا مە ل دەمێ ئەنفالکرن و قرکرنا کوردێن بوسرمان و سۆتنا مزگەفتێن دەڤەرێن بارزان، برادۆست، مزیری، دۆسکی ، سلێڤانی، بەرواری و سندی و گولیان؟
کیش موفتی و کیش ئایەتولاهێ بوسرمانێ نە کورد جارەکێ ب پشتگیریا ڤێ ئایەتا قورئانا پیرۆز فەتوایەک بۆ سه‌رخوه‌بوونا مە وەک قەومەک لێدانە: “يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا”
چەند بوسرمانێن عەرەب هاتنە هاوار مە دەمێ داعشێ هێرشکریە گوندێن بوسرمانێن کورد کو هەر مالەکێ قورئانا پیرۆزهەبوو و پێنج فەرزێ نڤێژێ بۆ خودێ خوە دکرن و سەرێن وان بری؟
چەند مەلایێن بوسرمانێ نە کورد ل سەر مینبەرا نڤێژا خوتبێ نزا و رەحمەت ودلۆڤانی بۆ ٥٠ ملیۆن کوردێن بوسرمان و تەپەسەر و بێ ماف ژ خودێ دخوازن و کوشتن و کرێتکرنا مە حەرام دکن؟
کیش بوسرمانێ نە کورد کوشتنا شەهید هاوار حمید شریف و ئەمەر محمد خالد بۆسەلی شەرمزار کر و هاتنە تازیا دەیکێن نڤێژکەر و بوسرمانێ ڤان شەهیدان حەجی ئەسمەرێ و حەجی فاتمێ؟ کو هەردو شەهید ژی بوسرمان و ب رۆژی و نڤێژ بین و ل سەر ئاخا خوە و بۆ بەرەڤانیا ئاخا خوە هاتنە کوشتن.
نوکە ژی ئەز و تو ب رۆژی نە و نڤێژا خوە دکه‌ین سەر ئاخا خوە و هەر بوسرمانێ تورک و عەرەب و فارس مە ل سەر ئاخا مە دکوژن و بێ رێز دکه‌ن و ئەز و تو یێ خوە مێرخاس دکه‌ین بۆ شەرێ عەرب و ئسرائیلییان کو هەردوکا تێرا خوە پارێزه‌ر ل ئەورۆپا و دەولەتێن عەرەبی هەنە و ٥٠ دەولەتێن بوسرمانان ژ وان ٢٢ دەولەتێن عەرەبی پشتا فه‌لستینیانە و ٥١ دەولەتێن ئەورۆپا و ئەمریکا ل پشتا جوهیا نه.
کوردێ خوەلیسەر و بەلەنگاز کی پشتا تە یە؟ نە ل سەر نەخشا دونیایێ و نە سەر دەڤ تو نك هەمی دونیایێ هەی و ئەڤێن تو بۆ وان دهۆلێ دقوتى ئینکارێ ل هەبوونا تە دکه‌ن و تو ل نك وان کافر و مولحدی! ل نك مولحدێ رۆژئاڤایی تۆ لەیزتۆکی و خوەش به‌هانه‌ى بۆ بەرژوەندیێن وان.
ڤێجا دەستێ خوە دەینە سەر سەرێ خوە و مایێ خوە د ڤێ شولێ نەکە هه‌كه مێر بی کارێ فەرتر هەنە بکه‌ی! ژ بیرنەکم ڤێ رەمەزانا پیرۆز و ل ڤێ جه‌ژن و ئەرەفاتان داخوازێ ژ خودێ بکه‌م کو خێرا بێهنۆیێ کورێ نەتەنیاهوی مەزن کت ب تنێ هەبوونا مە کەتە مەترسیێ، فەرمی پشتگیریا خوە بۆ کوردستانا سەربخوە راگەهاند، وەلەو بێهنۆ نە کوردە و نە بوسرمانه و نە ژى جیرانێ مەیە و چ خال و خوەهزاتی ژی مە گەل نینە، وەک ئەز دزانم و لەوا مە چ حەق سەر نەبی ڤێ جامێریێ بکه‌ت و کا ناڤ بەینا وی وعەرەبا چی هەبیت چ ژ مە نایێت بۆ وان بکه‌ین ژ بلی ئاخفتنا خێرێ
رزگار حه‌مید شه‌ریف
ماستەر ب زانستێن سیاسی
زانینگەها NTNU یا نێڤدەولەتی
شرۆڤەکارێ سیاسی
Rizgartolk@gmail.com
