سەرۆکێ ھەرێما کوردستانێ داخوازا چارەیەکا ئاشتییانە د ناڤبەرا فەلەستینی و ئسرائیلییان دا کر پشتی ھەردو ئالییان تۆپباران و بۆمبەبارانا ئێک دو کری و ب دەھان قوربانی ل دووڤ خوە ھێلاین. نێچیرڤان بارزانی د تویتەکی دا ئەڤرۆ رۆژا چارشەمبی راگەھاند، ئەو ژ رەوشا ئالۆز و شەر و پێکدانانێن ڤێ داویێ یێن ئسرائیل و فەلەستینێ دلگرانن کو چەندین وەلاتیێن سڤیل تێدا بووینە قوربانی و زارۆک ژی د ناڤ دا ھەنە و جھێن پیرۆز بووینە ئارمانج. نێچیرڤان بارزانی داخواز کر ھەردو ئالی بێھنفرەھـ بن و چارەیەکا ئاشتییانە بۆ رەوشا نھا ببینن. چەند رۆژێن بووری تەڤگەرا حەماس یا فەلەستینی چەندین جاران مۆشەک ئاراستەی ئسرائیلێ کرن و سوپایێ ئسرائیلێ ژی ب تۆپ فرۆکەیان بەرسڤان وان دا و ھێرش کرنە سەر کەرتێ غەززە و چەندین کەس بوونە قوربانی.
