سۆپایێ ئیراقێ هه‌ژماره‌كا حه‌شارگه‌هـ و تونێلێن رێكخستنا تیرۆری یا داعشێ ل كه‌ركوكێ په‌قاندن.
شانه‌یا ئه‌منى یا ئیراقێ راگه‌هاند؛ د چارچووڤێ ئۆپه‌راسیۆنێن هێزێن هه‌ڤپشك دا ل كه‌ركوكێ، 9 حه‌شارگه‌هـ، 3 تونێل و 15 بۆمبێن رێكخستنا تیرۆرستى یا داعشێ هاتنه په‌قاندن و ده‌ست ب سه‌ر 127 مووشه‌ك و 2 ماتۆرسكلێن وان دا هاته گرتن.
ژ ئالییه‌كێ دی ده‌زگه‌هێ هه‌والگرییا ئیراقێ د راگه‌هاندنه‌كێ دا دیاركر، پشتبه‌ستن ب زانیاریێن هه‌والگێرى و ب بریارا دادگه‌هێ ل چه‌ند جهێن جودا یێن كه‌ركوكێ وان شیایه شه‌ش تۆمه‌تبار ب تۆمه‌تا ماددێن هۆشبه‌ر ده‌سته‌سه‌ربكه‌ن كو هه‌موو سه‌ر ب رێكخستنا داعشێ بوون، ئێك ژ وان به‌رپرسێ پشته‌ڤانییا لۆجستى داعشێ بوو ل كه‌ركوكێ و ئێكێ دى پشكدارى د كۆمه‌لكوژییا سپایكه‌ر دا كربوو و تیرۆرسته‌كێ دى به‌رپرسێ سوته‌مه‌نیێ یێ وێ رێكخستنێ بوو.
هێزێن سۆپایێ ئیراقێ، پۆلیسێن و حه‌شدا شه‌عبى ئۆپه‌راسیۆنه‌كا سه‌ربازى ل ده‌ڤه‌رێن وادى شاى و وادى زه‌غیتۆن و گوندێ ساده و گوندی عه‌سرى ل سنۆرێ پارێزگه‌ها كه‌ركوكێ ده‌ستپێكرن.
