په‌رله‌مانێ ئه‌ورۆپا بریاره‌ك دژى توركیا په‌سه‌ندكر

په‌رله‌مانێ ئه‌ورۆپا توركیا ب بنپێكرنا مافێ مرۆڤى تۆمه‌تبار كر و بریاره‌ك دژى وى وه‌لاتى په‌سه‌ندكر.

په‌رله‌مانێ ئه‌ورۆپا پرۆژه‌یه‌ك ب ده‌نگێ پترییا ئه‌ندامێن خوه‌ په‌سه‌ندكر كۆ دێ گۆتۆبێژێن تایبه‌ت ب ئه‌ندامبوونا توركیا ل ئێكه‌تییا ئه‌ورۆپا هێنه‌ راگرتن.

ل گوره‌ى نوچه‌یێن میدیایێن توركیا، ره‌تكرنا بریارا دادگه‌ها مافێ مرۆڤى یا ئه‌ورۆپا ژلایێ توركیا ڤه‌ كو داخوازا ئازادكرنا سه‌لاحه‌دین ده‌میرتاش، هه‌ڤسه‌رۆكی پێشتر یێ پارتییا دیمۆكراتیك یا گه‌لان هه‌ده‌پێ كربوو، ئێكه‌ ژ وان ئه‌گه‌ران كو په‌رله‌مانێ ئه‌ورۆپا بریارا راگرتنا دانوستاندنێن دگه‌ل توركیا ده‌ركرى.

د پرۆژێ په‌سه‌ندكرى دا هاتییه‌، ره‌وشا دیمۆكراتى و سه‌روه‌ریا قانوونێ و مافێن مرۆڤى و ئازادییا راده‌ربرینێ ل توركیا گه‌له‌ك خرابه‌ و پێدڤیییه‌ حكومه‌تا توركیا سه‌ره‌ده‌رییا خوه‌ ب گوهۆریت.

ئێك ژ مه‌رجین په‌رله‌مانێ ئه‌ورۆپا بۆ ده‌ستپێكرنا دانوستاندنێن ئه‌ندامبوونا توركیا د ئێكه‌تییا ئه‌ورۆپا دا، دانپێدانا توركیا یه‌ ب كۆمكوژیا ئه‌رمه‌نان ژلایێ ئۆسمانییان ڤه‌ كو ده‌وله‌تا نها یا توركیا ب توندى وى بابه‌تى ره‌تدكه‌ت.