حەجی تەیب و مامێ قەرەیلان کێستە نە سۆرا ئامەدێ یە!
رزگار حەمید شەریف
ماستەر ب زانستێن سیاسی، ل زانینگەھا NTNU, نەرویج
تورکیا و پەکەکە ئەڤە ٣٠ سالە شەرێ خوە ڤەگوھاستیە باشوورێ کوردستانێ و سەدان گوند ژبەر ھێرشێن تورکیا و دەڤەرێن پەکەکێ بۆ خوە ناڤێ شۆرشێ دانایە سەر و کرینە دەڤەرێن لەشکەری، ھاتینە چوولکرن.
ھەرۆژ ھەڤالێن مامێ قەرەیلان و جەندرمێن تەیبی دەستدرێژیێ دکەنە سەر مە و ئاخا مە، پەکەکە پشتی ٤٠ سالێن شەر و لێگدانێ ھێشتا ئێک بھۆستا ئاخا کوردستانێ رزگار نەکریە و نەشیایە ناڤێ خوە ل ئەورۆپا و ئەمریکا ژ لیستا تیرۆرێ دا دەر بینیت و ناھێلیت HDP ژی ب رێیێن دیمۆکراسى مافێن کوردان دابین بکەت و ل وان ژی تێکدایە.
نە مە فرۆکە و تانک ھەنە بەرسڤا تورکیا بدەین و نە ژى حکومەتا فیدرال شیایە خوە بکه‌تە خودانێ ڤێ کێشێ و نە مە شیایە پەکەکێ رازی بکەین و بێژینێ ھەڤال بەھانێ نەدەنە دەست تورکیا، کەرەم بکەن ٣ پارچێن دی رزگار بکەن و وی وەختی بخۆ تخویب نامینن و کوردستان دێ بیتە ئێک، ئەم دزانین تورک دوژمنە و سەرێ مە نەڤێت، لێ ھەڤالێن قەندیلی گەر ھوین کوردی نزانن ئەم دێ ب تورکی بێژینە ھەوە باشوور یێ رزگارکریە فەرموون پارچێن دی رزگار بکەن Güney Kürdistan özgürdür, özgürleşmek için diğer bölgelere gidin.
ل سالا ١٩٩٢ ئێکەمین په‌رلەمان و حکومەتا کوردستانێ ھاتنە چێکرن، نە ئیران و تورکیا و سووریا بوون، بەلکو پەکەکە بوو ھێرشی ھەرێما کوردستانێ کری و پاشی ل سالا ١٩٩٥ێ ھێرشی دەڤەرێن بن دەستھەلاتا پارتی کر و ب سەدان گوند ھاتنە چوولکرن و ھزاران سڤیل ھاتنە کوشتن و پاشان تەڤگەرا ئیسلامی ھێرشی دەڤەرێن بن دەستھەلاتا ئێکەتیێ کر و ھێرشێن ھەردو ئالیان ژی بۆ نەھێلانا کیانێ ھەرێمێ بوون.
پشتی گرتنا عەبدوللا ئۆجەلانی ل سالا ١٩٩٩ێ، پەکەکێ سیاسەتا خوە ١٨٠ پلەیان گۆھارت، ژ بانگەشەیا رزگارکرنا ھەر چوار پارچەیێن کوردستانێ بۆ کۆمارا دیمۆکراتیک یا تورکیا گۆھارت و مە ل باشوورێ کوردستانێ شەھدە دا و گۆت ئێدی دێ ھەردولا بەلا خوه ژ مە ڤەکەن و دێ جارەکا دی گوندێن خوه ئاڤاکەین، لێ ئەڤ خەونە گەلەک درێژ نەبوو و دیسان پەکەکێ دەست ب سەر دەڤەرێن ھەرێمێ دا گرت و بەھانە دانە دەست تورکیا و تورکیا ژی زێدەتر ھاتە ناڤ ئاخا ھەرێمێ، ئەرێ باشە چ شولێ وان ل کێستە، باتیف، حەفتەنین و شەرانشێ ھەیە؟
وە سۆڕا ئامەدێ و جزیر و عەفرین کاڤل کرن، نوکە هه‌وە دڤێت ڤان سەرکەفتنا ل نك مە کۆپی بکەن؟
ب باوەریا گەلەکان ھەر جھەکێ تورکیا دڤێت داگیر بکەت، دێ دەستپێکێ ھەڤالێن په‌كه‌كێ ھنێریتێ و پاشی داگیرکەت، بەلێ وەسا ب ساناھی… گەلۆ تو بێژی دو ئالی تەمامکەرێن ھەڤ بن و ئێک ئارمانج ھەبن؟
