سەرۆکێ حکومەتا هەرێمێ پێشوازی ل شانده‌كێ هه‌یڤا سۆرا ئیماراتى کر

مه‌سروور بارزانى سه‌روكێ حكومه‌تا هه‌رێما كوردستانێ ئه‌ڤرۆ سێشه‌مبى، پێشوازى ل محه‌مه‌د ئه‌لفه‌لاحى ئه‌میندارێ گشتی یێ ده‌سته‌یا هه‌یڤا سۆرا ئیماراتى و شاندێ دگه‌ل دا كر.

د دیداره‌كێ دا ئه‌حمه‌د ئه‌لزاهرى كۆنسولێ گشتى یێ ئیماراتێ ل هه‌ولێرێ ئاماده‌ ببوو، شاندێ مێهڤان سلاڤ و رێزێن شێخ محه‌مه‌د بن زاید ئالنه‌هیان جێنشینێ ئه‌بوزه‌بى گه‌هاندنه‌ سه‌روكێ حكومه‌تێ و به‌حسێ گرنگى پێدانا په‌یوه‌ندیان دناڤبه‌را هه‌رێما كوردستانێ و ئیماراتێ كر د هه‌موو واراندا، دیسان جه‌خت ل سه‌ر  وێ چه‌ندێ كر، كو ئیمارات دێ یا به‌رده‌وام بیت ل سه‌ر هاریكاریكرنا ئاواره‌ و په‌نابه‌رێن هه‌رێما كوردستانێ ب تایبه‌تى ژى دابینكرنا ڤاكسینا كۆرۆنایێ بۆ كه‌مپان.

سه‌رۆكێ حكومه‌تێ سوپاس و پێزانین خوه‌ بۆ هاریكاریكرنا ده‌وله‌تا ئیماراتێ كرن ب تایبه‌تى هه‌یڤا سۆر یا ئیماراتى، خواستا حكومه‌تا هه‌رێما كوردستانێ بۆ گرنگیه‌كا زێده‌تر بۆ په‌یوه‌ندیێن دگه‌ل ئیماراتێ پشت راست كرن.