سهرۆكێ ههرێما كوردستانێ پێشوازى ل سهرۆكێ كۆمسیۆنا بهرگرییا نهتهوهى و سهربازى ل پهرلهمانێ فرهنسا و شاندێ دگهل دا كر.
نێچیرڤان بارزانى دگهل فرانسواز دۆماس، سهرۆكا كۆمسیۆنا بهرگرییا نهتهوهى و سهربازى ل پهرلهمانێ فرهنسا و شاندێ دگهل دا كۆمبوو و راگههاند؛ وهلاتێ فرهنسا ل دهمێن سهخت پشتهڤانییا مرۆڤى و سهربازى و سیاسى یا ههرێما كوردستانێ كرییه و هیڤى خواست فرهنسا ل سهر وان هاریكارییان بۆ ئیراقێ و ههرێما كوردستانێ بهردهوام بیت.
نێچیرڤان بارزانى و فرانسواز دۆماس داوى پێشهاتێن رهوشا ئهمنى یا ئیراقێ و ههرێما كوردستانێ و كریارێن تیرۆرستى یێن رێكخستنا تیرۆرستییا داعشێ و رۆلێ هێزێن فرهنسى و ههڤپهیمانییا ناڤدهولهتى د هاریكاریكرن و پشتهڤانییا ئیراقێ و ههرێما كوردستانێ بۆ بهرهنگاربوونا تیرۆرێ گۆتۆبێژكرن.
ههردولا ههڤرابوون كو داعش هێشتا گهف و ترسهكا راسته و بۆ ژناڤبرنا ئێكجارى یا وان ئیراق و ههرێما كوردستانێ پێدڤى ب بهردهوامى و پشتهڤانییا ههڤپهیمانییا ناڤدهولهتى یه.
ههروهسا پێشخستنا پهیوهندییێن ههڤپشك یێن ههرێما كوردستانێ و ئیراقێ دگهل فرهنسا و پهیوهندییێن ئیراقێ و ههرێما كوردستانێ دگهل وهلاتێن دهڤهرێ و ههلبژارتنێن بهێت یێن ئیراقێ و چارهسهركرنا كێشێن بهغدا و ههولێرێ و ماددێ 140 یێ دهستوورى، لایهنهكێ دى یێ كۆمبوونێ بوون.
