پارێزگارێ دهۆكێ پشتى 11 مه‌هان ل ده‌ستبكاربوونێ، ئه‌ڤرۆ سێشه‌مبى پشكدارى د كومبوونا جڤاتا پارێزگه‌ها دهۆكێ دا كر و راگه‌هاند، ئه‌وان ئاریشا خه‌لكی و پرۆژێن خزمه‌تگوزاریێ گۆتوبێژ كرینه.
د. عه‌لى ته‌ته‌ر د كۆنگرەکێ رۆژنامەڤانی دا راگه‌هاند، دلخوشه ئه‌ڤرۆ ل جڤاتا پارێزگه‌هێ ئاماده‌بوی و به‌حس ل پرۆژە و كاران كری، ئه‌ندامێن جڤاتێ چه‌ندین تێبینى یێ جودا پێشكێشكرن ئه‌وا دشیان دا دێ كار ل سه‌ر كه‌ن، هه‌روه‌كى پێشتر بێ راوستان و ماندیبوون کار كری.
ل دۆر هه‌بوونا بنگه‌هـ و باره‌گه‌هێن په‌كه‌كێ ل سنۆرێ پارێزگه‌ها دهۆكێ و پێكدادانا وان دگه‌ل سوپایێ توركیا، عه‌لى ته‌ته‌ر گۆت: ئه‌و دگه‌ل چ هێزێن نه قانوونى دا نینن، داخاز ژى كر هێزێن نە قانوونى ژ ئاخا هه‌رێما كوردستانێ بچنە ده‌رڤه، ژبه‌ركو هەبوونا ڤان هێزان ب تنێ زیانێ دگه‌هینیته خه‌لكى و ژینگه‌ها هه‌رێما كوردستانێ.
پارێزگارێ دهۆكێ پشتراست كر ، بزاڤێ دكه‌ن ل ده‌مه‌كێ نێزیك ئه‌و گوندێن ژبه‌ر شه‌ر و پێكدادانا چوول كرین قه‌ره‌بوو بكه‌ن و یا د شیان دابیت پێشكێشى خه‌لكى خوه بكه‌ن .
