ئەندامهكا پەرلەمانێ کوردستانێ ژ فراکسیۆنا پارتی راگههاند، ئەو وەکو هاتینە هەلبژارتن کو بچنە پەرلەمانێ کوردستانێ دا کو نوونەراتیا خەلکی بکەن و داخازا مافێ وان بکەین، لێ ل ڤێ دوماهیێ هندەک ئەندام پەرلەمان گرژی و ئالۆزیێن ب مەرەم دروست دکەن و ئەڤەژی دبیتە رێگری کو پڕۆژە قانوونێن د بەرژەوەندیێن خەلکی دا نەهێنە بجهـ ئینان و خەلک مفای ژێ ڤان ئالۆزیان نابینیت، هندی ئەڤ ئالۆزیە هەبن پرۆژە قانوونێن د بەرژەوەندی یا خەلکی دا ناهێنە بجهـ ئینان.
گولستان نهێلی تایبەت بۆ خانی نیوز راگههاند، خەلکێ هەرێما کوردستانێ بێزار و تۆرهیه ژ ڤان ئالۆزیێن پەرلەمانێ کوردستانێ، ژبەرکو خەلکی زەحمەت و ماندیبوونا دیتی و چاڤەرێی کارێن باش ژ پەرلەمانی دکەن بۆ خۆشکرنا ژین و ژیارا وان، لێ ل دەمێ دیتنا ڤان جۆرە کریارا خەلک بێزار دبیت.
نهێلی گۆت ژی: مەرەما وان کەسان ئەوە دەما نێزیکی هەلبژارتنان دبن ژبۆ راکێشانا سهرنجا خەلکی و بانگەشێ، هندەک کەس ڤان کریاران د هۆلا پەرلەمانێ کوردستانێ ڤه دكهن، کو بەری نوکە وان کەسان داخوازا مافێن خەلکی نەکریە.
گولستان نهێلی، ئەنداما پەرلەمانێ کوردستانێ ژ فراکسیۆنا پارتی گۆت ژى: ئەو وەکی فراکسیۆنا پارتی دخوازن هەموو تشت ب ئارامی و ب شێوەکێ جوان ب رێڤە بچن، ژبەرکو چ تشت ب شەری و ئالۆزیان چارەسەر نابن.
