بەرپرسهكێ وەزارەتا کاروبارێن جڤاكى یێ حکومەتا هەرێما کوردستانێ راگەهاند: رهشنڤیسێ قانوونا چاکسازیێ و شیاندنا گرتییان هاتییه ئامادە کرن و ل ڤان نێزیکان دێ رەوانەى جڤاتا وەزیران و پەرلەمانى هێته كرن، داكو ببیته قانوون.
ئەحمەد نەجمەدین رێڤهبەرێ گشتی یێ چاکسازیێن وەزارەتا کار و کاروبارێن جڤاكى ل ههرێمێ راگەهاند ژى: رەشنڤیسێ قانوونا چاکسازیێ و بهرههڤكرنا وان كهسێن هاتینه سزادان، ئێکە ژ وان پڕۆژێن وەزارەتا کار ئامادە کرى بۆ چاوانییا مامەلەکرنێ ل گهل چاکسازییان و كهسێن سزادایى، چونکى ههتا نوكه ل هەرێما کوردستانێ قانوونهك نەبوو بۆ مامەلەکرنێ ل گهل گرتى و زیندانییان، بەلكو ئەوا هەیی سیستەمهک بوو پشت ب قانوونا ژمارە 104 یا سالا 1981 یا ئێراقى بەستبوو”.
گۆت ژى: رهشنڤیسێ قانوونا چاکسازیێ و شیاندنا گرتییان دەستکەفتهكێ باشە، چونکى ههموو ئەرک و مافێن گرتییان و زیندانیان تێدا هاتینه چەسپاندن، چونکى مەرهم ژ راگرتنا وان کەسانە یێن ژ زیندانان دهركهفتین و بهرههڤكرنا وانه دناڤا جڤاكى دا.
