<h3 style="text-align: justify;"><span style="font-size: 18pt;">ئەندامەکێ پەرلەمانێ کوردستانێ دلگرانیا خوە ل ھەمبەری ھاتنا سۆپایێ تورکیا بۆ دەڤەرێن سنورى یێن پارێزگەھا دھۆکێ و شەرێ پەکەکێ و تورکیا دیار کر و گۆت: ئەو شەرێ نھا ل دەڤەرێن ھەرێما کوردستانێ دھێتە کرن شەرەکێ نەیارانەیە بۆ تێکدانا ئارامییا دەڤەرێ.</span></h3> <h3 style="text-align: justify;"><span style="font-size: 18pt;">رێڤینگ ھرۆری، ژ فراكسیۆنا پارتی بۆ خانی نیوز دیار کر ژى: بەری چەند رۆژان وان ب فەرمی یاداشتەک دایە سەرۆکاتیا پەرلەمانی ل سەر وێ زوردارییا ل سەر خەلکێ دەڤەرا ئامێدیێ دھێتە کرن، كو شەرەکێ بێ رامانە و تورکیا و پەکەکێ ئینایە سەر ھەرێما کوردستانێ.</span></h3> <h3 style="text-align: justify;"><span style="font-size: 18pt;">گۆت ژی، پشتی سۆپایێ تورکی چەند جھێن ستراتیژی ل دەڤەرێن سنۆری یێن دەڤەرا بەرواری بالا گرتین ژلایێ باکوری ڤە ب درێژاھییا زێدەتری ١٥ کیلومەترا رێک گەھاندینە دەڤەرێن ھەرێما کوردستانێ و ب رێیا کۆمپانییان دەست ب برینا دارستانێن ھەرێمێ کرییە و کو بوویە بابەتەکێ جیھانی، ب دیتنا رێڤینک ھرۆری ئەوا نھا ژلایێ تورکیا دھێتەکرن و برینا دارستانێن ھەرێمێ جینۆسایدە بەرامبەری ژینگەھا کوردستانێ دھێتە کرن.</span></h3> <h3 style="text-align: justify;"><span style="font-size: 18pt;">ھرۆری خویاکر ژی: دەربارەی برینا دارستانێن ھەرێمێ ژلایێ تورکیا ڤە وەزارەتا چاندنێ و ژێدەرێن ئاڤێ یا حکومەت ھەرێما کوردستانێ و دەستەیا ژینگەھێ رایا جیھانی ئاگەھدارکرییە کۆ ژینگەھا ھەرێما کوردستانێ ژلایێ تورکیا ڤە دھێتە بنپێکرن.</span></h3> <h3 style="text-align: justify;"><span style="font-size: 18pt;">خانى نیوز، عهبدوللا عهلى</span></h3>
