زارۆک بناغە و پاشەرۆژ و ھیڤی یە، لەوما پێدڤیە لسەر شەنگستەکێ جوان و ب رێکوپێک یێ زانستی بھێنە پەروەردەکرن و پێدڤی ب گرنگیدانێ نە ب ھەمی لایان ڤە، چ ل دەمێ مال یان ل باخچە و قوتابخانێ، مخابنی ڤە ئەڤ زارۆکێن ڤان چەندین سالێن دوماھیێ ژدایک بووین ل کوردستانێ ژچەندین لایان ڤە تووشی کێماسیان بووینە وەکو لایێ ئابووری، سیاسی، پەروەردەیی، فێرکرن و دەروونی، ھەلبەت ئەڤە بۆ وێ چەندێ ڤەدگەریت سەرەرایی کو ئەم کورد بەردەوام و ب درێژاییا دیرۆکێ تووشی کارەسات و دەردەسەریان دبین و زارۆک ژ قوربانیێ سەرەکی بوویە د ڤان کارەساتان دا، بەلێ ھەر ژ سالا ٢٠١٤ێ وەرە گەلەک کارەساتێن دی پەیدا بووینە و ب سەر مللەتێ مەدا ھاتینە، وەکو شەرێ تیرۆریستێن داعشێ ل سەر ھەرێما کوردستانێ کو ھەژمارەکا مەزن ژ زارۆکێن کوردان تایبەت کوردێن ئێزیدی تووشی جینوسایدا بووینە ژلایێ تیرۆریستێن داعشێ ڤە و قەیرانا ئابووری یا ب سەر ھەرێما کوردستانێ ژی داھاتی کارتێکرنەکا نیگەتیف ھەبوویە کو ھیڤیێن زارۆکان بھێنە بجھئینان، ل ڤی دوماھیێ ژی پەیدابوونا ڤایرۆسێ کۆرۆنایێ یاکو جیھان ھەمی ڤەگرتی ئەم کورد ژی بێ بەھر نەبووینە ژڤێ چەندی، ڤێ جارێ کارەساتەکا دی و ب شێوەیەکێ دی زارۆکێن مە تووش بووینە، ئەو ژی ژلایێ پەرورەدە و فێرکرنێ ڤە، ئەڤە ھەمی ئەگەرن لاوازی بکەڤیتە فێربوون و پەرورەدەکرنا زارۆکی ژبەرکو ئەڤ کارەساتە و قەیرانێن مەزن د پاشەروژێ دا دێ باجا خوە ھەبیت، لەوما یا پێدڤییە ل سەر ھەمیان دوبارە ڤی باری ھەلگرین ھەر ئێک ژلایێ خوەڤە و ب تایبەت سازیا پەرورەدێ بارێ وێ ژھەمیان گرانترە ڤی باری ھەلگریت و داکوکیێ ل سەر پلان و بجھئینانا بەرنامێن خوەیێن پەرورەدەیی بکەت و زارۆک بھێنە پێگەھاندن و ھشیارکرن و گرنگیەکا باشتر پێ بھێتە دان.
