ئه‌ردۆغان: مه‌خموور ژى وه‌كو قه‌ندیلى ئارمانجا مه‌یه‌

سه‌رۆككۆمارێ توركیا راگه‌هاند، وه‌لاتێ وى هندى قه‌ندیلى گرنگیێ دده‌ته‌ مه‌خموورێ ژى، ژبه‌ركو مه‌خموور لاندكا قه‌ندیلى یه‌ و پێدڤییه‌ داویێ ب گه‌ریلایێن په‌كه‌كێ ل وان جهان بینن.

ره‌جه‌ب ته‌یب ئه‌ردۆغان د به‌رنامه‌یه‌كێ تێله‌ڤزیۆنا ته‌ره‌ته‌ یا توركى دا ل دۆر به‌رهنگاربوونا گه‌ریلایێن په‌كه‌كێ راگه‌هاند، مه‌خموور ژى بۆ وان هندى قه‌ندیلى گرنگه‌ و پێدڤییه‌ داویێ ب كارێ خوه‌ بینن و گه‌ریلایێن په‌كه‌كێ ل وان جهان نه‌هێلن.

ئه‌ردۆغان گۆت ژى: نها په‌كه‌كه‌ تووشى ئالۆزیێن مه‌زن بوویه‌ و نه‌شێت گه‌ریلایێن نوو ته‌ڤلى رێزێن خوه‌ بكه‌ت.

بریاره‌ ئه‌ڤرۆ رۆژا چارشه‌مبى جڤاتا ئاساییشا نشتیمانییا توركیا ب سه‌رۆكاتییا ئه‌ردۆغانى كۆم بیت و پرسێن ستراتیژى گۆتوبێژ بكه‌ن و ب تایبه‌ت ئۆپه‌راسیۆنێن سوپایێ توركیا ل ناڤا سنۆرێن هه‌رێما كوردستانێ.