ئه‌مریكا په‌یامه‌ك ل دۆر حه‌شدێ دایه‌ حكومه‌تا ئیراقێ

ویلایه‌تێن ئێكگرتى یێن ئه‌مریكا حكومه‌تا ئیراقێ ئاگه‌هدار كرییه‌ هه‌كه‌ نه‌شێن كۆنترۆلا حه‌شدا شه‌عبى بكه‌ن، ئه‌مریكا دێ وى كارى كه‌ت.

ژێده‌ره‌كێ ژ حكومه‌تا ئیراقێ ئاشكرا كر، بالیۆزخانه‌یا ئه‌مریكا ل به‌غدا په‌یامه‌ك بۆ حكومه‌تا ئیراقێ هنارتییه‌ و تێدا دلگرانییا خوه‌ همبه‌رى هه‌ژموونا حه‌شدا شه‌عبى و كۆنترۆلكرنا زۆنا كه‌سك ل به‌غدا و نێزیكبوونا وان ژ بالیۆزخانه‌یا ئه‌مریكا دیار كرییه‌.

ئاشكرا ژى كر، د په‌یاما ئه‌مریكا دا هاتییه‌ هه‌كه‌ حكومه‌تا فیدرال نه‌شێت كۆنترۆلا حه‌شدا شه‌عبى بكه‌ت یێن هێزین وان ل زۆنا كه‌سك به‌لاڤ بووین، ئه‌مریكا دێ وى كارى كه‌ت و كۆنترۆلا ره‌وشێ كه‌ت.

چه‌ندێن رۆژێن بوورى هه‌ڤڕكیا حه‌شدا شه‌عبى د گه‌ل حكومه‌تا به‌غدا گه‌هشتیه‌ گۆبیتكێ، ئه‌و ژى پشتى ده‌سته‌سه‌ركرنا فه‌رمانداره‌كێ حه‌شدێ ب ناڤێ قاسم مسلح ژ ئالیێ هێزێن ئێمناهییا ئیراقێ ڤه‌، ژ به‌ر وێ یه‌كێ ژى حه‌شدا شه‌عبى هێزه‌كا مه‌زن ل ده‌ردۆرا زۆنا كه‌سك به‌لاڤ كرییه‌ بۆ وێ یه‌كێ حكومه‌تا ئیراقێ نه‌چار بكه‌ن وى فه‌رماندارى ئازاد بكه‌ن.