زیانڤێكه‌فتیێن كه‌مپا شاریا دێ هێنه‌ قه‌ره‌بۆكرن

پشتى ئاگر ب خیڤه‌تێن كه‌مپا شاریا یا ئاواره‌یێن شنگالێ كه‌فتى و نێزیكى 400 خیڤه‌تان سۆتین، هه‌ر ئێك ژ سه‌رۆكێ هه‌رێ و سه‌رۆكوزیرێن هه‌رێمێ و پارێزگارێ دهۆكێ و  نه‌ته‌وه‌یێن ئێكگرتى و وه‌زاره‌تا كۆچ و كۆچبه‌رێن ئیراقێ هاتنه‌ سه‌ر خه‌ت و پشته‌ڤانى و هاریكاری بۆ زیانڤێكه‌فتییان دوپات كر.

نێچیرڤان بارزانى، سه‌رۆكێ هه‌رێما كوردستانێ به‌رهه‌ڤییا خوه‌ بۆ هاریكاریا زیانڤێكه‌فتییان دیاركر و ئالیێن په‌یوه‌ندیدار راسپاردن كو یا پێدڤى بكه‌ن.

ژ ئالییه‌كێ دى ڤه‌ مه‌سروور بارزانى، سه‌رۆكوه‌زیرێن هه‌رێما كوردستانێ ل دۆر روودانا ئاگربه‌ربوونێ ل كه‌مپا شاریا پشته‌ڤانییا ته‌مام یا حكومه‌تا هه‌رێمێ بۆ دابینكرنا پێدڤیێن وان و قه‌ره‌بۆكرنا زیانڤێكه‌فتییان دوپات كر.

هه‌روه‌سا د. عه‌لى ته‌ته‌ر، پارێزگارێ دهۆكێ ئاشكرا كر كو هه‌ر ئێك ژ سه‌رۆكێ هه‌رێمێ و سه‌رۆكێ حكومه‌تا هه‌رێمێ په‌یوه‌ندیێ پێ كرییه‌ و پرسیارا ره‌وشا ئاواره‌یێن كه‌مپا شاریا كرییه‌، ته‌ته‌ر به‌رهه‌ڤییا پارێزگه‌هێ ژى بۆ هه‌ر كاره‌كێ پێدڤى دیار كر. 

ژ ئالییه‌كێ دى ئیڤان فائیق جه‌بار، وه‌زیرا كۆچ و كۆچبه‌رێن ئیراقێ ئاشكرا كر، ئه‌و  د گه‌ل مسته‌فا كازمى، سه‌رۆكوه‌زیرێن ئیراقێ ئاخفتییه‌ و رازى بوویه‌ بۆ هه‌ر مالباته‌كا زیانڤێكه‌فتى كۆژمێ 500 هزار دیناران وه‌كو قه‌ره‌بۆ بهێنه‌ مه‌زاختن.

هه‌ر وه‌سا رێكخستنا نه‌ته‌وه‌یێن ئێكگرتى بۆ كاروبارێن په‌نابه‌ران د تویته‌كى دا راگه‌هاند، ئه‌و د گه‌ل به‌رپرسێن حكومه‌تا خوجهى ل سه‌ر خه‌تن بۆ دابینكرنا هاریكاریان بۆ مالباتێن زیانڤێكه‌فتى.

دوهى ئاگر به‌ربوو كه‌مپا شاریا یا ئاواره‌یێن شنگالێ و نێزیكى 400 خیڤه‌تان سۆتن و چار كه‌س بریندار بوون، دو ژ وان ژى كارمه‌ندێن ئاگرڤه‌مراندنێ بوون.